Matthew 13:1–23
Buchithepa gente thu
Tua ni’n Jesu tua inn akipat apeikhie a, tuipi pieu ah atouta hi. Tualeh mihonpi ageiah ahing kikhawm ua, tuachin kuongkhat ah aluut a, atou a, mipite tuipieu ah ading uhi. Khumin gentena in thu tampi akung uah agena: “Ngai un, buchithepa buchithe dingin akuon hi. Athe lai in khenkhatte lam laiah akie ua, vate’n atomsiengta uhi. Buchi dangte suongphuum lah ah akie ua aleitang asaalou jieh in ahingpou pai ua, hinanleh ni ahing sat chiengin, a emvuoia, thahui aneilou jieh un avulpaita uhi. Buchi dangte ling lah ah akie ua, lou lingnei ahing khanga, adeepmangta hi. Tualeh khenkhatte leihoi ah akie ua, tuachin ga hoitah asuong ua, khenkhatte ale za in apienga, khenkhat sawmguh in tualeh khenkhat te sawmthum in. Bilnei jousien kijaahta un,” achi hi.
Gente thu kigenchienna
Tualeh nuazuite ahing pei ua, akungah, “Bangdinga gentena a thu nagen jing ahiei?” achi uhi. Aman akung uah: “Vangam thuguuh nathei ding ua hing kipie ahia, amaute theiding akiphalsih hi. Aneite akipiehbe dinga, tuachin aneiseem ding uhi. Aneiloute akipat in aneisunte uh zong akilahpieh ding hi. Munapi’n amusih ua, janapi’n ajasih ua zong atheilou jieh un akung uah gentena thute kagen ahi. Guolnei Isai in atungtaang thu uh anagensate ataangtunna ahi; “Na ja ding ua, hinanleh na theijou sihding uhi; Na muding ua hinanleh na muchi en sih ding uhi. Ajiehpen mipite lungsim thasietna in adima, abilte uh abingdenta hi; tualeh amit un amu ut ua, abil un aja ut ua, tualeh alungsim un atheichien ut ua, tuachin ka kunga ahing kinuale ua ahileh keima’n pellou in amaute ka damsah kha ding hi. Hinanleh na mit un amutah jieh in ahampha nahi uhi, tualeh najaahtah jieh un, na bilte uh ahampha uhi. Chitahtahin ka hinghil ahi, guolnei tampite leh midihtat tampi’n na sil mute uh amunuom ua, ahivang amusih uhi, a ja nuom ua hinanleh ajakhasih uhi.
Buchithepa gentena thuhilchetna
“Buchithepa gentena thu thei un, Koipou leenggam thu abil a ja a theisiemlou khu lampi dunga kie buchi bang ahi. Tualeh migilou ahing pei a alungtang sunga kithesa khu alahmang pieh jeel hi. Suonghuum lah a kithete pen: thu kigente za a, thanuomtah a sangpaite bang ahi. Hinanleh thahui asuong sih ua, tomnou khat sung aum hi; thu kigente jieh a gimthuohna ahiei, gawt nate ahiei, atun chiengin thakhat in apuata uhi. Louling lah a kithete pen, thu kigen jate ahi ua, hinanleh leitung lungkham leh hausatna, hinnopna in tua thute adeepgawp a, ahuutsahta hi. Leihoina mun a kithete pen, thu kigen za a, atheisiemte ahi; agapai ua, khenkhat zakhat in, khenkhat sawmguh in, khenkhat sawmthum in agata uhi,” achita hi.
