Luke 12:1-7
Lepchiena thu a anuazuite a hilna
Mipi atul in ahing kikhawm ua, kituonkha tuo a aum laitah un, Jesu’n a nuazuite kungah tambangin thu agen hi: “Pharisaite tol lah akipat in kiveeng siem un, khumi khu alepchiena uh ahi. Kilangdohlou dinga iim bangma aumsih a, theilou dinga seelguuh bangma aumsih hi. Tuachin miel lah a nagen tapou uh vaah ah akiza ding a, tualeh inndan sunga na dapgente uh inn tungah phuonzaah in aum ding hi. Nuazuite a haantawhna “Lawmte aw, kahing hil ahi, tahsa that thei a, anua a bangma lawtheiloute giing sih un. Hinanleh koi e giin ding kahing hil ding hi: Tahsa atha jou chieng a gawtmun a sawlluuttheipa khu giing un; ahima hi, kahing hil ahi; giing un! Vatou nga paisa ni a kizua hilou amah?Hinanleh Pasian maiah khat zong mangngil in aumsih ding hi. Na lutung ua na samzangte uzong simsiengsa ahi. Tuajiehin zausih un, vatou tampi saangin na manpha zaw uhi.
