Matthew 8:5-17
Roman gaalkap mangpa suoh adamsahna
Khumin Kapernaum khuo aluut in akungah gaalkap mangpa khat ahing peia; “ Topa ka suohpa ajawngkhaal in innah aluma, anatna athuohla mama hi,” chin angen hi. Khumin Aman akungah:“Hing pei vang in damsah vang,” achi hi. Tualeh gaalkap mangpa’n akungah: “Topa, ka innsung nang luutna taah ahisih, thuteng khat gen lachin ka suohpa adam ding hi, kei zong dan nuoi a um kahia, ka nuoi ah gaalkapte aum sawn uhi, tualeh khatpa kunga, ‘Pei in,’ ka chileh apei a, adangkhat kunga ‘Hing pei in’ ka chileh ahing pei hi, tualeh ka silapa kunga: ‘Tami bawl in,’ ka chileh abawl pai hi,” achita hi. Jesu’n athugen ajaah chiengin, lamdang asa a, anuazuite kungah “Chitahtah in kahing hil ahi; tam banga ginna lien Israelte lah ah kamu ngaisih hi. Kahing hil ahi, suolam leh tumlam akipat mi tampi ahing pei ding ua, vangam a Abraham, Isaak leh Jakobte toh a toukhawm ding uhi, Gamsung tate pen a pulam miel ah pai in a umding ua, tuanah kap-le-hagawi in aum ding uhi,” achita hi. Khumin Jesu’n gaalkap mangpa kungah: “Peita’n na gintaatna bangin nang adingin hing tungta hen,” achi hi. Tuachin asuohpa tua huntah in anadamta hi.
Jesu’n Peter sungnu adamsahna
Tuajouin, Jesu Peter innah avaluut a, Peter sungnu chithuo in ana lum hi. Tualeh akhut in atham a, tuachin achithuo abeita hi, tualeh tuaminu athoupai a, aneh atah ding uh abuoipita hi.
Jesu’n mi tampi adamsahna
Tuani’n dawipaite tampi akungah ahing pui ua, tualeh kamteng khat in dawite adeldoh a, tuachin chinate adamsahta hi. “Aman i hatlounate ala a, i natnate apuo hi,” chia guolnei Isai in anagen sa ataangtun nading ahi.
