Luke 11:47-54
Na tung uh agih hi! Ajiehpen napu napate un athasa uh guolneite haan na siem uhi. Tuajiehin nouhaw napu napate uh nasep theipite leh lung luutpite nahi uhi. Ajiehpen, amauten athat ua nouten a haan nabawl uhi. Tuachin, Pasian pilna in zong, ‘Amau kungah guolneite sawltahte kasawl ding a, amauten khenkhat a that ding ua, khenkhat abawlgenthei ding uhi,’ achi hi. Tualeh leitung kisiem chiil akipat a guolneite sisan luong pen tami hah-le-suonte tungah phuba laah in aum ding hi. Abel sisan akipat in maitaam leh munsieng kikaal a mangthaipa Zekariah sisan tadong khu, kahing hil ahi, tami hah-le-suonte tungah phuba laah in aum ding hi. Dansiemte aw, natung uh agih hi! Ajiehpen thei siemtheina kotkil na lamangta ua, aluut nuomte lah nakhaam ua, nouma lah naluut nuom sih uhi,” achi hi.
Khumna kipat a apawtdoh bep in, laigielte leh Pharisaiten thu tampi khat gensah asawm ua, bang agen khiel kha ei chin ataang uhi.
