Matthew 9:36 – 10:8
Tuachin mipite khu aching ding bei keel nguoite banga gimthuoh leh kithethaanga aum uh amutah in alai natpita hi. Tualeh anuazuite kungah: “Bu laahding atam mama a, hinanleh aseemdingte atawm uhi; Tuajieh in bu lakhawm dinga naseemte hing sawlding in bunei Topa kungah ngen un,” achi hi.
Sawltah sawmlenite kisawlna
Tualeh anuazui sawmlenite akungah ahaan a, akung uah dawipaite tung leh tuate deldoh na ding leh damlouna leh natna jousie damsah dingin thuneina apie hi. Sawltah sawmlenite min: Amasapen in, Peter kichipa Simon leh a sanggampa Andrew; Zebedi tapa James leh asanggampa John; Philip leh Bartholomai, Thomas leh siedong Matthew; Alpheus tapa James leh Thaddeus; Kanaan mipa Simon leh amansahpa Judas Iskariot ahi uhi. Sawltah sawmlenite nasep Tam sawmlenite Jesu’n asawl a akung uah hichin thu apie a: “Jentelte lah ah peisih unlen, tualeh Samariate khopi sungah luutsih un. Ahivang in, Israel nam keelnguoi mangthangte kungah peijaw un. Tualeh na peikawm un:“Van gam anaita hi,”chin baan gen un. Damloute damsah unlen, mishite kaithou unlen, phaahte siengthousah unlen, dawite deldoh un: amanbei in namu ua, amanbei ma in pie un.
