Mark 12:38-44
Jesun laigielte ademna
Tualeh athugenna khat ah hichin agen hi: “Laigielte tungah pilvang un, miten azataat ding uh ngaituona’n vanzuana lah pou a puontuol sila vahkawi a-ut uhi. Kikhopna ah touna saangpen, tualeh pawi bawlna ah zataatna mun bang anga ut uhi. Meithaite a innpum un avalmang ua, alim dan in thu ngetna saupipi anei ua, tuajieh in amauten mawsahna saangpen anga ding uhi.”
Meithainu thawlawm piehna
Khumin ama sumkoina mun gei langah aum a, tua sunga mi tampi tuohkhawm pie a hingpei ana en hi. Mi hausa tampi’n sum tampipi ahing khie uhi. Tualeh meithai zawng mama khat ahingpei a, dangka neen ni ahing khie a, tuamigeel pen akigawm in paisa san khat ahi. Khumin Jesu’n anuazuite ahaan a, akung uah, “Chitahtah in nakung uah kahing gen ahi, tami sumkholna mun a, sum tuohkhawm lah ah, meithainu’n atam tuohpen hi. Ajiehpen midangten tampi anei lah ua themkhat atuoh uh ahia, amanu’n azawn jieh a anei sunsun apieh sieng ahi. Tualeh ahinna jousie apieh ahi,” achi hi.
