Mark 10:32-45
Khumin Jerusalem zuon in lampi ah ahing peitou ua, Jesu amasapen in apang hi. “Ngai un, Jerusalem zuon a peitou ihi ua, tualeh Mihing Tapa siempuliente leh laigielte khut sunga pieh in aum dinga, amauten tha ding in siemmaw atangsah ding uhi. Tualeh lawkite kungah ape ding ua, amauten eengbawl in atungah achil uh aphiit ding ua, tualeh asaat ding ua, athat ding uhi. Tualeh nithum zou chieng in athou ding hi,” chin agen hi. Tualeh Zebedi tate James leh John akungah ahing mapei ua, “Siepa, nakunga kahing nget jousie uh hing bawlpieh dingin kahing dei uhi,”achi uhi. Tualeh aman akung uah, “Nou dinga bang hing bawlpieh ding in nahing dei uoi?” achi hi. Amauten akungah, “Na thupina ni ahing tun chieng khat naziet ah, tualeh khat navei ah hing tousah in,”chin agen uhi. Jesu’n akung uah, “Nahing sil doh uh natheisih uhi. Kei dawnna nou nadawn ngam nading uh amah? Ahilouleh Kei baptisma tanding pen nou zong natang ngam nading uh amah?” achi hi. Amauten akungah, “Ka bawl ngam ding uhi,”achi ua, tualeh Jesu’n akung uah, “Ka dawn ding nou pen nadawn ding ua, ka tan ding baptisma zong na tang ding uhi. Hinanleh ka ziet leh kavei lam a tou ding pen kei hing pieh ding ahisih hi. Tualeh tami khu atou ding a guotsa a umte a ding ahi,” achi hi. Khumin nuazui sawmten azaah chieng un, James leh John tungah alungthahta uhi. Tuachin Jesu’n amaute ahaan a, akung uah, “Lawkite lah a, vaipuo a pangten mipite tungah puohgih aguon ua, atung uah athuneina uh asuo uhi. Hinanleh noute lah ah tuachilou ding hi. Nalah ua alien a pang dingte na suoh uh ahi ding uhi. Tualeh koi hinanleh nalah ua masa ding pouma khu na suoh uh ahi ding ahi. Ajiehpen Mihing Tapa zong miten a naa seppieh dinga hingpei hilou in, ama mi naa seppieh dinga hingpei ahizaw hi,” achi hi.
