John 13:1-15
Jesu’n nuazuite keeng asilna
Khumin Peisan pawi masang in, Jesu’n tami leitung taisan a, Pa kung azot nading hun atungta chi athei chieng in, leitunga ami itte, atawp tan in a it hi. Tualeh nitah ann aneh laitah un dawi in, Simon tapa Iskariot lungsim a ama le-heeh ding thu akoi lai in, Jesu’n Pa in sil jousie akeemta a apieh khiehdan leh, ama Pasian apat a hing kipan ahidan, tualeh Pasian kunglam zuon ding ahi dante thei zing kawm in, anitah ann-nehna pat in ahing dingkhie a, apuonte akoi khie a, tuachin kinuulna puon in akawng agaah hi. Tualeh kuong ah tui asung a, nuazuite keeng asilpieh a, akigaahna puon in abaan nuulpieh zeel hi. Simon Peter kung ahing tung a, tualeh Peter in akungah, “Topa ka keeng sil talawm ding namah?”achi hi. Jesu’n akungah, “Bang bawl kahiei chi tu’n nathei naisih ding hi, hinanleh nualang chieng in nahing thei ding hi,” achi hi. Peter in akungah, “Nang kei keeng sil laizang sihva teh,” achi hi. Jesu’n, “Nahing silsah louleh kei kungah tan naneisih ding hi,” achi hi. Simon Peter in akungah, “Tuachi ahileh Topa, ka keengte guoh hilou in, ka khutte leh ka lutang zong hing sil pieh in,” achi hi. Jesu’n akungah, “Kisil jousate dingin akeeng loungaal sil ding aumsih, asiengthousa ahita hi, tuachin noute na siengthou uhi, hinanleh na unpi un vang nahisih uhi,” achi hi. Ajiehpen aman ale[1]heeh dingpa athei a, tuajieh a, “Na unpi ua siengthou nahisih uhi,” achi ahi. A keengte uh asilzou in apuonte ala a, atouna ngai ah atoukia a, akung uah, “Na tung ua kasilbawl dan nathei uoi?” achi hi. “Nouten siepa leh Topa nahing chi ua, nagen dih uhi, kahima hi. Tuachin kei na Topa uleh na Siepa un na keengte uh ka sil leh, noute zong khat-le-khat keeng na kisiltuo ding uh ahi. Natung ua kabawl bang a na bawlthei nading ua, etsahna kahing pieh nahi uhi.
