Luke 11:15-26
Hinanleh pawl khat in, “Beelzebul kichi dawite mangpa panpina a dawite adeldoh ahi,” achi uhi. Pawl khat in ama ze-etna in van akipat a aman sil lamdang aumsah ding asui uhi. Hinanleh aman a ngaituote uh athei a, akung uah, “Leenggam khat akikhenkeeh a akidou uleh amangthang ding ua tualeh innkuon khat zong akikhen ua akidou uleh khumi innsung adingzou sih ding hi. Tualeh Setan zong akikhen a ama-le-ama akidou leh bangchin agam adingzou diei? Tuajieh in ‘Beelzebul panpina a dawite adeldoh hi,’bangchi dan a na hing chithei uh amah? Tualeh Beelzebul panpina a dawite deldoh ka hi leh, na tapate un bang thahaatna toh dawi adelhdoh uh e? Tuajiehin amau te na thu uh hing khenpieh ding hita uheh. Tualeh Pasian khutma toh dawite deldoh ka hileh Pasian gam na kung uah ahing tungta ahi. Pasal haat khat in gaalvan toh a inn hoitah a aveen leh avante bangma chilou in aum hi. Hinanleh ama saanga haatzaw khat ahingpei chiengin a kimuonna agaalvante alaahpieh a, anei-le-alamte a thethaang pieh hi. Kei toh um khawmloute kei hing dou ahi ua, koipou ahing laah khawm pilou in athejaah hi.
Kisiemphatna buchinglou zau huoi dan
“Dawite mihing khat akipat apawtdoh chieng un tui umlouna mun lah ah tawldam nading asui ua, amu zoulou chieng un, ‘Kahing pawt dohna mun ka inn ah kakileta ding hi,’ achi hi. Tualeh ahingpei kia in aumna munpen phiet ngimsa leh abaisa a um amu hi. Khumin ama a pawtdoh a, ama saanga gilouzaw dawi sagi ava haan a, aluut ua, a teengta uhi. Tualeh tua mihingpa umdan pen amasang saangin a khawhzaw hi,” achi hi.
