John 11:45-56
Tualeh Mari toh hingpei Jiute khenkhat in asilbawl amu ua, agingta uhi. Hinanleh khenkhatte Pharisai te kungah avapei ua Jesu silbawlte avahilta uhi. Tuachin siempuliente leh Pharisaiten vaihawmte ahaan ua, “Bang ilaw ding uoi? Tampa’n lah sillamdang tampi abawlthei a, hichia i umsahsah leh, mi jousien agingta sieng ding uhi, tuachin Romante ahingpei ding ua, i mun siengthou leh i nam pumpi ahing suse ding uhi,” achi uhi. Hinanleh alah ua mi khat, Kaiaphas tua kum a siempipa a napangpa’n, “Nouten bangma theisih uteh, i nam pumpi manthailou na dinga mi jousie taanga mi khat ashi khu ahoijaw ahi chi natheisih uhi,” achi hi. Tami ama nopthuop a agen ahisih a, Jesu ashi ding thumavang gen ahi. Tualeh tami khu namte a ding maimai hilou in leitunga Pasian ta kithethaang jousie pawlkhat a apui khawmthei nadingin zong ahi. Tua chin tuani akipat in bang chileh akithatthei diei chin kihouna anei uhi. Tuajieh in Jesu Jiute lah ah langtangin apeinawn sih a, tuana kipat in Ephraim kichi gamsip lam nai a um khopi lam ah apeia, tuanah anuazuite toh aumta uhi. Tualeh Jiute Peisan pawi hun anaita a, mi tampi kisiensuo dingin agam uakipat in, Peisan pawi masang in Jerusalem ah ahaw uhi. Tuachin Jesu asui ua, biehinn sunga ding in khat-le-khat akihou na uah, “Bangchin na ngaisut uoi Peisan pawi a hing hawlou ding adiei?” akichi uhi.
