John 5:17-30
Hinanleh Jesu’n akung uah, “Kapa’n tu dong in naa aseem a, ken zong kaseem hi,” chin adawng hi. Tami jieh a Jiuten tha dinga asui sui uh ahia, khawlni nitlou chithamlou in, Pasian a Pa ahisah a, Pasian toh kibang in akikoi hi.
Tapa vaihawmna
Jesu’n akung uah, “Pa silbawl amute loungaal Tapa’n ama deibang in bangma abawlthei sih hi; ajiehpen aman ana bawl jousie khu Tapa’n tua mabang a abawl ahi hi, chi thutah kahing hil nahi uhi. Pa in Tapa a it a, tuachin asilbawl jousie a ensah hi; tualeh lamdang nasah ding uh tamte sanga silbawltheina thupizote a ensah nalai ding hi. Ajiehpen Pa’n mishite akaithou a ahinsah mabangin Tapa’n zong adeisahte hinna apie hi. Pa’n koima tung thu akhensih a, hinanleh thukhen vaihawmna jousie Tapa kungah apezota hi. Mi jousien Pa a zataat mabang ua, Tapa azataatthei nading un koizong tapa zataatloute ama sawlpa Pa zataatlou ahi. Koi zong kathu za a, kei hing sawlpa gingtapouma’n kumtawn hinna anei dinga, atung thu khen ahinawnsih dinga, shina apat pawt in hinna ah aluutzota ding hi, chi thutah kahing genpieh nahi uhi. Ahun tungding ahita a, tun zong atung ma ahita hi, tua hun chieng in mishiten Pasian Tapa aw aza ding ua, tualeh azapouma ahing ding uhi chi thutah kahing hil nahi uhi. Ajiehpen Pa’n ama ahinna akinei mabangin Tapa zong ama ahinna nei dingin asiem a, tualeh Mihing Tapa ahijieh in vaihawm thuneina apie hi. Tami thu ah lamdang sasih un, ahun hing tungding hita, tuachieng in haankuong a um jousien a aw aza ding ua, tualeh ahing pawtkhe ding ua, silhoi bawlten hinna nga dingin athou ding uhi, tualeh silse bawlte pen siemmaw tang dingin athou ding uhi. “Ka thuthu in bangma bawlthei kanei sih a, kazaah bangbang in vai ka hawm hi;ka vaihawmna dihtah ahi, ajiehpen ken ka ut lamlam bawl ka sawm sih a, hinanleh ama kei hing sawlpa deilam bawl ka sawm ahizaw hi.
