John 5:1-16
Tuikhuuh a damtheina
Tam silte zou in, Jiute pawi khat aum a, Jesu Jerusalem khuo ah azintou hi. Tualeh Jerusalem ah Keelnguoi Kot kungah tuikhuuh khat Hebru haam a Bethzatha achi uh aum a, innliep nga anei hi. Tuanah china, mitto, keengbai, phalsite alum uhi. Bang hun ahiei khat chieng in, Topa vansawlsieng khat tua tuikhuuh ah akumsuh a, tuachin tui asau a, koi pou tami tui kisau ni a, ava kumsuh masapenpen bang chibang natna nei hinanleh adam pai hi. Tuanah kum sawmthum-leh-giet vingveng china khat aum hi. Jesu’n ama amu chiengin, kum sawtpi khat damlou a um ahita chi athei a akungah, “Damsah na ut amah?” achi hi. Chinapan “Pu tui hing kisau chieng in, tuikhuuh sunga hing dom ding mi koima kaneisih a, ka kuon chieng in midang khat in ahing makhelh paipai hi,”chin a dawng hi. Jesu’n akungah “Thou inlen, na netpha la’nlen pei in,” achi hi. Tualeh thakhat in tuamipa adamta a, tuachin anetpha ala a, apeita hi. Tuani pen khawlni (h) ahi. Tualeh miten damna ngapa kungah, “Tuni khawlni ahi, na netpha napuoh pen dandihlou ahi,” achi uhi. Ahivangin aman akung uah, “Kei hing damsah pa’n kakungah, ‘Na netpha la’nlen pei in,’ ahing chi ahi,”chin adawng hi. Amaute’n akungah, “Koi ahiei na kunga, ‘Na netpha la inlen pei in,’ chipa?” chin adong uhi. Damna nga pa’n koi ahiei chi atheisih hi ajiehpen tua muna pei mi atam seeng jieh in Jesu ana peidohta hi. Anuasang khat in, Jesu’n biehinn ah amu a akungah, “Ngai in, na damta a, khielkia nawn sin, natung a silsezoseem bangma ahing tunlou nadingin,” achi hi. Tualeh tuamipa avapei a, Jiute kungah, “Jesu ahi ahing damsah pa,” avachita hi. Khumin khawlni in mi adamsah hi chin Jiuten Jesu abawlsie uhi.
