Luke 15: 1-3, 11-32
Khumin siedongte leh mikhiel jousie athugen ngai dingin ahing kuon uhi. Tuamin Pharisaite leh laigielte a phun chiet ua, “Tam mipan mikhielte apom a, ann pou anehpi hi,”achi hi. Khuchin aman tam gentena thu akung uah agen a,
Tapa taimang gentena thu
Khumin aman agen a, “Mi khat in tapa ni anei a; tualeh adawng zopenpan apa kungah,‘Pa aw, ka goutan ding teng hing pien,’ achi leh apa’n anei khu atate ni ahawmpiehta hi. Khumin tomkhat jou in atapa adawngzopen in atanteng alakhawm a gamlapi khat a khuolzin in akuonta hi; tuamun ah anei jousie noptatna in azang a aunpi’n ajangbeita hi. Khuna anei jousie avajahzou nua in tuami gam ah kielpi ahing tunga, neh ding aki tasamta hi. Tuachin ama zong akuon a tuami gam a mi khat a vabeelta a; tuamipa’n ama khu a loulanga voh ann peding in asawlta hi. Khumin aman zong vohte neh mawhte a agil vasah a ut mama a; hinanleh ama khu koiman neh ding apesih hi. Hinanleh atawp ah ahing khanglou a, ‘Ka pa kunga neh kilawten ann neh senglou tampi nei ua, kei lah tana gilkiel thuoh a shi ding himawh tang e! Ka thou dinga kapa kungah kapei dinga akungah, ‘Pa aw, van leh nang mitmu in sil kabawlkhielta a, kei na tapa a simtaah zong kahi nawnsih a, tuajieh in na suohte lah a khat bangin hing pangsah maita’n, ka vachi ding hi,’ achi hi. Khuchin athou a apa kung ah ahingpeita hi. Tuachia ama gam lapi khat a ahing gei bep in apa’n ana gaalmu a, lungsiet seengseeng in adelh a, a ngawngkawia atawpta hi. Khumin atapa’n akungah, ‘Pa aw, van leh na mitmu in sil ka bawlkhiel a, keipen na tapa chitaah zong kahi nawnsih hi,’ achi hi. Hinanleh apa’n asuohte kungah, ‘Puon hoipen hing la meeng unlen, a keeng ah kedap khat butsah un; tualeh bawngnou thau khat hing kai unlen, gou un, khuchin i ne ding ua kipahtah in i um ding uhi, ajiehpen, tam ka tapa ashisa ahing hingkiata hi’ ama khu a mang a, akimukiata hi,’ achi hi. Tuachin kipahtah in aumta uhi. “Tualeh a tapa taahpen lou ah aum hi; tualeh ama inn ahing tun kuon in khuong-le[1]daah kitum ging leh laam thawmging azata hi. Khumin aman zong asuohte khat ahaan a, bangpen bawl ahi uoi chi adongta hi. Tuachin asuohpa’n akungah, ‘Na naupa ahing tunga, chidam ludam a na pa’n ama khu a mukia jieh in bawngnou thaupen khat agaw ahi,’ achi hi. Tuamin ama alungthah seengseeng man in a inn ah aluut nuom tasih hi. Tuachin a pa ahing pawtkhie a ama a zawlta hi. Hinanleh aman apa adawng a, “Ngai vawi kum hitanveipi kang na keem in kahing na huoi a, na thu kahing niel kha ngai naisih a, ka lawmte toh guolnop ka bawl na dingin keelnou khat zong nahing pe kha naisih hi. Hinanleh na tapa kizuate kunga na sumteng va jang zou siengpa ahing tunbep in bawngnou kivaahthau khat na na gawpieh pai hi!’ achi hi. Khumin, aman atapa kungah, ‘Ka tapa, nangpen kakunga um zing hichin a, kanei jousie zong nanga asima, kipahtah leh nuomtah a na um ding hizolou amah, ajiehpen tami na naupa ashisa ahing hingkiata hi, amangsa i mukiata hi,’ chin a dawng hi,” achi hi.
