Matthew 5: 17-37
Dan lui leh Jesu dan
“Dan thu leh guolneite thu beisah dinga hingpei in hing ngaisut sih un; abeisah dinga hingpei kahi sih a, abukimsah dinga hingpei kahijaw hi. Chitahtah in kahing hil ahi, van leh lei aman masangsien danthu sutvom neunou khat ahiei thaivom neunou khat ahiei abawn a ataangtun masangsien mangvawtlou ding ahi. Tuachin koi hinanleh tam thupiehte lah a neupen khat naan thoh a, khumbanga bawlding a mite thuhil khu van gam a mi neupen ahiding hi. Hinanleh koipou thuhil jui pouma vangam ah mithupi akichi ding hi. Na dihtatna un laigielte leh Pharisaite dihtatna akheelsih leh vangam ah lutvawt sih va uteh, chi kahing hil ahi”.
Lungthahna leh tuolthana thu
“Nidang laia mite kungah tuol na thalou ding ahi, kichileh koi hinanleh tuolthat pouma thukhenna mun ah ading ding hi, kichi na jata uhi.’ Ken, koi hinanleh a unau tunga lungthah pouma thukhenna mun ah ading ding a, tualeh koi hinanleh a unau gense pouma vaihawmna munah ading ding hi; tualeh koi hinanleh “Nang mimo!” chipouma gawtmun mei athuoh ding hi, chi kahing hilh ahi. Tuachin maitam bul a na silpieh na lat laitah a na unau in natunga lungkimlouna anei chi nathei leh, tua maitam masangah na silpieh nuasie inlen, pei inlen na unau kilempi phot inlen, tualeh na silpieh hing laan pan in. Na langpa toh thukhenna lampia na jawhkhawm laitah un, kithukimpi juai in, tua ahilouleh na langpa’n vaihawm mi ahing mansah dinga, vaihawmten mimante kungah ahing pekhe ding ua, thong ah ahingkhum ding uhi. Chitahtah in kahing hil ahi, paisa sankhat nangawn napieh sieng masangsien tuana pat in na suohta sih ding hi. Aangkawmlou ding thu “Angkawm sin” kichi na jata uhi. Kenbou, koi hinanleh numei khat pouma mawpi nopna lungsim a a etleh a aangkawm jouthamta chi kahing hil ahi. Khumin na mit zietlam in ahing mawsah leh kheudoh inlen, paihiau in, na sapum gawtmun a akipai sangin na tahsa hiengkhat amanthai khu nanga dingin ahoijaw hi. Khumin na khut zietlam in ahing mawsah leh tansan inlen, paihiau in, na sapum gawtmun a akipai sangin tahsa hiengkhat manthai khu nang dingin ahoijaw hi.
Zi khuul thu kihilna
“‘Koi hinanleh zi khuul pou ma’n kikhuulna lai amanu pie hen’, zong aki chi hi. Hinanleh ken koi hinanleh midang toh akhel* man hilou a, azi khuul pouma’n amanu khu aangkawmsah ahi; khumin koi hinanleh khulsa kinunpi pouma aangkawm ahi chi kahing hil ahi.
Kichiemna leh thutah
“Khanglui mite kungah,’Zuou thu in kichiem sinlen, Topa kunga na kichiemna uh taangtunjaw un kichi zong jata uteh.’ Ken kahing hil ahi, kichiem malmal sih un; van lou in kichiem sih un, tuapen Pasian mangtouna ahi, lei lou in zong kichiem sih un, tua khu akeeng ngapna ahi. Jerusalem min lou in zong kichiem sih un, tuapen leeng thupipa khopi ahi. Na lutang lou in zong kichiem tuom sih un, samjang khat zong na kaangsah un, na vomsahthei tuonsih uhi. Na thugen upen ‘Ahi’, ahiloule ‘Hilou’ hivanglah heh, thu dang pouma gitlouna apat a hing piengkhie ahibou hi.
