Mark 7:1-13
Upate tawndan thu a Jesu dawnnate
Khumin Pharisaite leh laigielte Jerusalem apat a hingpeite Jesu kungah ahing kikhawm uhi. Anua zuite pawlkhat in khut buakawma ann aneh uh amu ua, tualeh khut sillou china ahi. Ajiehpen Pharisaite leh Jiuten upate tawndan azui ua khut sillou a ann nelou ahi uhi. Tualeh vanzuana akipat a ahingpei chieng un, amaute akisiensuo sih uleh ann anehlou uh ahia, tualeh beel leh kuongte leh noute sum-enga kisiemte silsieng ding dan leh tawndan azui uh tampi aum hi. Khumin Pharisaite leh laigielten, “Bangdinga na nuazuiten upate tawn dan zuilou a, khutbua kawma ann aneh uh ahiei?”chin adong uhi. Tualeh aman, “Ahi, nou milepchiete Isai in ahing nagensate tam bangin akigiel hi: Tam miten akam un ahing zataat ua, hinanleh alungsim ulah kei toh akigamla hi. Mihing thupiehte ahil jieh un, kei ahing bieh uh amawhna ahi. Nouten Pasian thupieh na nuasie ua, tualeh mihing tawndan dettah in nazui uhi.” Tualeh aman akung uah hichin agen hi: “Pu-le-pa tawndan nazui nalam un, Pasian thupieh pampaina lampi hoi nanei uhi.’ Mousi in nanu napa zataat un, tualeh ‘Koizong anu leh apa gensete tha in umhen,’ achi hi. Hinanleh nouten ‘Mikhat in anu ahilouleh apa kungah nou a ding teng Korban ahi,’ (Pasian kunga kipesa, china) chi leh adih hi, nachi uhi. Tuachin nouten mi’n anu leh apa dinga asilbawl ding phallou nahita uhi. Tuachin napu napate uh tawndan nazui jieh un Pasian thugen zuilou nahita uhi. Tualeh tambang naa tampi nabawl uhi.”
