Mark 6:14-29
Baptispa John shina
Leengpa Herod in Jesu min ahing kithan ana zata hi. Mi pawlkhat in “Baptispa John shina akipat a hingthou ahijieh a tam sillamdangte abawlthei ahi,” achi uhi. Hinanleh midangten “Elijah ahi” achi ua khenkhat in hunlui laia guolneite banga, guolnei khat ahi,’ achi uhi. Khumin Herod in ajaah bep in John angawng ka tanpa hing thou ahi,” achi hi. Ajiehpen Herod in asanggampa Philip zi Herodias akiteenpi jieh in, John man ding in mi asawl a, akaanlawm a, thong sungah akoi hi. John in Herod kunga, “Na sanggampa zi na kiteenpi dan dihlou ahi,” achi jieh a Herod in amat ahi. Tualeh Herodias in amuda mama a, athatnuom a hinanleh athatthei sih hi. Ajiehpen Herod in John pen misiengthou leh midihtat ahijieh in agiing a, thalou in aumsah hi. Tualeh John pen kipahtah in aum hi chi azaah in alungbuoita hi. Ni khat Herod in apien ni in annkuong aluia, tua sungah agamsung mite leh milien milalte leh Galili a lamkaite ahaankhawm hi. Tami ni’n ama dingin hunlem ahing tung hi. Ajiehpen Herodias tanu ahing laam a, ama leh amichielte alungkimsah mama hi. Khumin Herod in nungahnu kungah, “Nadei penpen ngen in kahing peding hi,” achi hi. “Ka leenggam kimkhat hinanleh zong kahing peding hi,” chin akichiemta hi. Tualeh amanu anu kungah avapei a, anu kungah, “Bang ka ngen diei?” chin adonga anu’n “Baptispa John lutang ngen in,” achi hi. Khumin leengpa kunga ahing kile pai a, “Kuong sung khat ah Baptispa John lutang hing pien,” chin angenta hi. Tualeh leengpa ada mama a, hinanleh amichielte leh athuchiem jieh in, athugen pen aniel ut sih hi. Tualeh aveenga um gaalkap khat John lutang hingtawi dingin leengpa’n asawlta a, amapa akuon a thong sungah angawng ava tanta hi. Tualeh alutang kuong sungah ahing tawia, nu ngahnu kungah apie a, amanu’n anu kungah apeta hi. Anuazuiten, tuami azaah bep un, aluong ava la ua, haankhuuh sungah asielta uhi.
