LUKE 16:1-13
Khumin Jesu’n anuazuite kungah, “Mihausa khat in sumkeem khat anei a, tua a sum keempa’n anei-alam asumang sieng hi, chin aheehta uhi. Tuamin aman ama a haan a akungah, ‘Hichibanga na tungtaangthu ka zaahte bang chidan ahiei? Nei-le-lam nakepte umdanteng leh apeidanteng hing hilchien vawi, ajiehpen tubaansie sum keem in napangthei nawnsih ding hi,’achi hi. Khumin sumkeempa khu ama-le-ama ahing kingaituo a, ‘Ka pu’n sumkeem a ka panpen ahing tawpsah leh, bangchi ding kade aw! Lei lai ding lah ka tha a haatsih a, khutdaw ding lah ka zum in. Ka sum kepna apat ahing kitawp sah chieng a midangten a inn ua ahing zintunsahthei nading un ka bawl dingdan ka ngaituokheta hi,’ achi hi. Khuchin aman apu sumba jousie ahaankhawm a amasapenpa kunga ‘Ka pu sum bangja naba ei?’ chia adohleh, 6aman ‘Thau tena zakhat,’ achia. Khumin sumkeempan akungah, ‘Na laidal la inlen, tou inlen, sawmnga giel in,’ achi hi. Khumin, aman midang kungah, ‘Nangin bangza ahiei na bat?’ achileh, aman, ‘Mangbu tena za-khat,’ achia. Khumin aman akung ah, ‘Na laidal la inlen, sawmgiet giel in, ’achi hi. Tuachia kituuplou sum keempa’n pilvaangtah leh kichientah a abawltheitah jieh in apu in ama khu apahtaat hi; ajiehpen khovah tate saangin tammi leitung tate tulai khangthu ah apilzaw uhi. Tualeh kahing hil ahi, dihtatlouna sum in lawm-le-guol kisiem inlen, sumpen abei hun chienga kumtawn a aumna a noute zong ahing umsahthei na dingin. Adih a sum zahna Koi hinanleh tawmnoukhat tunga gin umpa tampi tungah zong a gin-um hi; tualeh koi hinanleh sil neunoukhat tunga dihtatlou khu sil lienpi tungah zong gintaat aum sih hi Sumkeem tungtaanga bawn na gin-um sihleh koi in ahiei noute sum dihtah hing keemsah ding? Tualeh midang tunga bawn nagin-um sih uleh nouma dingin koi in ahiei ahing pieh ding? Suoh khat in pu ni naa aseem khawmthei ngaisih hi; ajiehpen khat amuda dinga, khatpen a lungsiet ding hi, ahisihleh aman khat ahum tuom dinga khat apai ding hi. Pasian naa leh sum naa naseem khawm theisih ding uhi,” achi hi.
