Itna ankuang hihminsia/subuah:
30th May, 2025 (Ziltawpni)
" Hiaite ahi na itna ankuang lui uh hihminsia, amau mimal na kisep in, maingaltakin na ankuanglui uh ahong um ngam uhi; amaute zaw mei tuipai lou, huih in a lang alang a amut lengte uh; phavang a singgahlou, nihvei sikhinsa, a zung a khalhkhiaksate" Juda. 1:12
Hiai itangtel ah Juda in sinsaktu takloute leh ginna (thukhunthak sinsakna) puk/kiheisante gamtat dan agenna ahi.
Khristian masate tuh khat lehkhat ki ittuah in a thilneihte uh kikop in, khat leh khat bang ana kizintun tuah uhi. Galatia gam a Derbe khomi Korinth khu a leng inn nei Gaius in Korinth saptuam pumpi bang ana zintun hial hi(Rom.16:23) Ban ah Malta ah long tuahsiatna na tuakte mi 276 te Publia in nithum sung siamtak in ana zintun hi (Nas.28:7)
Hichibang in a inlamte khong uah khat le khat kithuahkhawm kawm in ankuangte bang ana sawk khawmzel uhi.
Hiai a itna ankuang (Love Feast) agape feast toh kisaiin laisiangthou in hiai ahi chih genchianlou a, himahleh tulai a khenkhatte'n fundraise na ding a ankuang alui ua, sumpiak a va nekte bang ahi kei hi. Hunbi nei a paikan ankuang bang a azat uh leng ahi kei chih i thei hi. Hilhchiantu khenkhat in saptuamte khat leh khat kithuahkhawmna leh kihihhatna ding a ankuang aumsekte, kizintun tuahnate uh gen ahi a, Toupa nitak an genna hilou in, akhenchiang in Toupa nitak ankuang ichi hiam, Toupa dohkan toh azomkhawm zel uhi, achi uhi.
Akoi abang hita leh igennop pen saptuam sianthouna hihbuah theite lak apan pilvan poimoh ahihdan igennop ahi.
Thutak pialsan, Khrist thukihilhna thu a om gige lou, ahihhang a Khristian gimnam tuabang mite'n Khrist saptuamte itna ankuang lui hihmin sia ua, thildang sem kawm in huai annkuang va um zel uhi.
Paul in huchibang mite toh nek leng nekhawmlou ding a a gen bang in ginna lam a paikhialte za lentak a ankuang sawksak thilpoi hikha thei ahihman in pilvan poimoh hi.
Amaute tuh:
- Mei tuipai lou- Khrist thu tangkoupih sam napi a gah neiloute.
- Huihmut leng- Sinsakna tuam a zak pepeuh gingtasuk mawkte
- Phavang a singgahlou- Sepsuah neilou, Khrist a gah neilou mite.
- Nihvei sikhinsa- Sinsaktu takloute leh nungtolhte apianthak ma ua si leh apianthak nung ua ginna akihei mangsan ziak ua si nawn nihvei sikhinte ahi uhi.
- Azung ua kalhkhiak sate- Nihvei puk/sita uh ahihman un zungkalh(uprooted) a omta uh ahihman un hin lamet na ding om nawnlou, Pathian thangpaihna meikuang amaban uh hita, bawlthak theih hinawnlou (Heb.6:4-6; 10:26-27) Pathian in lehngatsanta alehngat sante.
Tuabang mite'n misiangthoute itna ankuang hongsawk louh uh achidam huainpen ahi.
Awle, eite khelhna lam a sikhintate khelhna ah hiai mite bang in I lutkik nawn kha ding uh.
- I ginna tuipiak hun mangngilh kei ni.
- Mahni ki enchian zel ni.
- I omdan uh Khrist tanchinhoih toh kituak sak ni.
- Diabol, khelhna dou ni.
