Pu Trump vaisaina neia vaitaite kinawmangna US siempupite’n (bishops) angiel ua, Pu Trump gamtatna tungtangah alungkimsih uhi. Gamdang pan a USA a hing galtai leh hing vaitaite agam ua kihon sawl kia pen gamtat dih ahisih a, mihing itmawna akilang mama hi chi’n lungnopmawna aphuong uhi.
Phamsa Pu Pope Francis inzong vaitai leh galtaite ina san dinguh ahi chi’n tamveipi ana gen hi. Galtaite ahileh, agam ua gal aum jieh a taidoh uh ahia, amahaw hi galtai ichi uhi, ahi’n vaitaite ahileh, agam ua, kiel leh natna, tualeh gam kiuhdan ajieh apawl umlou jieh a gam sang khat a taidohte ahi uhi. Galtaina leh vaitaina pen tulai in summet bawlna asuohta hi. Ataite’n kuong leh tembaw neite leh vaitai saite sum toh aguhgol ua, asaite’n sum tampi ala ua, ka genza ei pie’n, tua na tun nadinguh gam ah kahing tut nading uhi achi uhi. Atai jousie atun nadinguh gam a tung jou ahituonsih uhi. Kuong leh tembaw let a tuong ahijieh un kuong leh tembawte tuisunga tum pawl aum a, mi tamtah in ashilaw vagiap uhi.
US siempupite’n limpia (video) khat ahawm ua, tami limpi ah hichi’n agen uhi: “Vaitaite kihonkhumna a hindan ahel mama a, amahaw lah a hagau nasepna zong akiphal jepjepsih hi. Pastorte leh siempute’n amahaw deibangin ave theisih ua, bangma hagau nasepna akithupisesih hi. US pansa a kihawlmangte’n koima gam mi hina lai anei nawnsih ua, US ah atengthei nawnsih ua, ahing kuonna gam u’ah zong ana kisang kiasih ding uhi. Koima gam mi asuoh nawnsih uhi. US bishopte’n Laisiengthou akawh ua, tua dungzui in, meltheilou khat in kahing peia, nahing vaidot hi chia kigielte akawh uhi. Ganhon naw banga mihing inaw uh sil dih ahisih a, mihing leh ganhing akibangin ien uhi chi’n US Bishops’ Conferencte’n lai asuo uhi. Topa in igam ua lamkaite’n dihtah a vai ahing hawm thei nadingun thu ngen va ui chi’n US Katholik pawlpite ahanthawn uhi.
Pu Pope Leo inzong 4 November ni’n Rome Khuopi ah hichi’n ana gen hi: “Kum tampi na tengsa tualeh bangma buoina na bawllou mi tamtah nawkhiet in aum a, dahuoi sa ing. Vaitaite zong hagau nei ahi ua, hagau a akisapte uh ipieh ding akilawm hi. Vaitai enkolte’n siempute phalna pie henlen, hagau a akisapnate uh pie u’leh hoiva chi’n ka ngen hi” achi hi.
