Tukum in Ramadan leh Ziatan hun kipat akibang hi; Asia gamkaia biehna lamkaite’n kilemna dinga nasem khawm dingin chielna nei

Kumtampi jou in, Muslimte hun siengthou Ramadan leh Christian te Lent season kipat ni ahing kibang hi—February 18—Muslimte leh Khristien pawlpi mite dinga hun siengthou.

Feb 6 nia suhlam Philippines a Bishop Jose Colin M. Bagaforo of Kidapawan in Mindanao in a pastoral lai hah na ah tami biehna pawlpi nite kungah chielna anei a, thungetna maimai hilou a ihindante uleh inasepnate ua kipat a lemna tuna ding ihanchiem ding uh ngai ahi achi hi.

 “Tami hun mankhawmna hi Pasian thupha ahi,” Filipino Bishop pu in achi hi, tahsan mite chiel in, “Pasian kunga kile kia in ginna toh lamzawt vai” tuhun gaal leh kikhenna tampi a umlai in.

Ramadan leh Lent hi biehna tawndan a thunget hun, ann-ngawl hun, kisiana hun leh silhoi bawl hun ahi. Atuom lam a en ding hilei ani gel in khat-leh-khat hindan kihilna leh migentheite khotuona ahi.

Christian leh Islamic lai siengthou pan a la in tami pastoral lai hah in kilemna athupi pen in atahlah hi adieh in Jesu in lemna siemte thupha apiehna leh Quran in kilemna inn a lut nadinga achielna.

Kilemna kichi gaal umlou na maimai hilou in Pasian toh kipawlna, khat-leh-khat kitheisiemna leh silsiemte theisiemna ahijo hi chi’n tami laigiel in atahlah hi.

Khuo leh hui suhsietna hi gaal a thautang thauvui in mi asuhsiet bang ahi achi hi. Pope Francis laigiel Laudato Si’ leh Fratelli Tutti tungtang gen in khuo leh hui iitna leh kephoina tualeh migentheite neu etna khu khuo leh hui suhsietna toh akibah thu agen hi. Tami tungtang hi Islamte silsiemte tunga thuilna a khalifa kichi silsiem kemtu chi atahlah hi.

Tami kithuhilna hi Christian, Muslim, civil society group leh interreligious dialogue desk te thungetna leh nasepna chiel in, migentheite panpi ding, silsiemte kepbit ding, kilemna thu hil ding tualeh leitung buoinate a pankhawmna a pan la nadinga chielna toh atawp hi.

“Tamte hi nasep siengthou ahi, Bishop Bagaforo in achi hi. “Tami nasep hi kilemna dinga sepna ahi.”

Bishop Bagaforo hi Catholic Bishops’ Conference of the Philippines Commission on Interreligious Dialogue a chairman ahi.

Translated by: William Zo