Zani 13 September in India Prime Minister Modi in Meiteite tenna khopi Phai leh Eimite tenna Lamka khopi zinkhie in thugenna nei hi..
Lamka khopi hing zin sungin Peace ground Tuibuang ah thugenna neina ah namkal buaina kamteng bangma genlou in development projects dangka 7300 crore Manipur pumpi a sepkhiet theina dingin honna nei hi.
Pu Modi in namchin lamkaite leh mipite jousie kunga gamsung ah kilemna leh muanna um theina dingin panlah khawm chiet vai chin ngetna leh hanthawn thu agen ah, tuana jong Namkal buaina gal jieha inn leh lou kihaltum leh galtaite dingin inn tha 7000 kilampi ding ahi chin phuang khietna nei hi.
Mipi mai a thu agen masang in galtai kum 2 val relief camps tuamtuam ah umte kimupi in tualeh ki hou khawmpina jong nei ah, tuana naupang khat in Pu Modi lim asuai pen piena nei ah, khat in nam lukhu khusah hi.
Pu Modi zinna ding nasatah in Lamka khopi, lampi hileh akim apam hileh naltahnou in kijemhoi sepsop in etlawm mama ah ahinlah ani atun ni'n guo haajut jiehin sil ki guong bangin pei theitah sih ah, ama jong Phai khopi Vanleng kuan ah tuh in, tuana pat lampi ah mawtaw toh hingpei in lampi, kim leh pam ama mu dinga ki bawlte ah mutah sih hi.
Pu Modi hing zing sungin Eimi chikimte’n nam zatpuon chiet awsahna nei ah tualah jong Zo/Zou namte jong tel in awsah uhi. Pu Modi vaiguon uap in Eimi politician, Eimi CSOs tuamtuam lamkaite leh mipi asang , az in guo leh dai kai jong leh tel uhi..
Pu Prime Minister Modi Manipur hing zin, namkal buaina lha 28 (28 months) achin jou ah hing zin masa na ahia, ‘’India khantouna dingin kilemna poimaw dan thu gen a,’’ tuatoh Phaisung vaiguon Meiteite toh uap tawn dingin deltou in pei kia tah hi.
