Myanmar Gam a Myitkyina Diocese a siempu khat bieh innsunga Mass siengtho abol laitah in thau toh nga vei ana kikap hi.
Thu kizah dan in meltheilou thau toi mi ni in Mohnyin khuo a St. Patrick’s Church a Parish Priest Fr. Paul Hkwin in Mass siengtho anei laitah in ana kap uhi.
Kum 40 a upa Fr. Paul Hkwin hi pawlpi mite leh boarding naupangte toh Mass abol laitah a ana kap uh ahi.
Topa Aung hi 2013 kum a siempu hina ding suhdetna na nga ahi. Tu leh tu’n Topa Aung hi zatou innah etkawl in a om hi. Topa Aung in Pasian na asep nate ah pawlpi mite lungsietna ana nga mama hi, adieh in Khamti Parish a omlai in. Tualeh Topa Aung hi khangnoute, migentheite leh gal jieh a galtai mite lungsiet leh panpi zing khat in akithei hi.
Tambanga Topa Aung tunga silting hi apatna ahisih a, Apeisa lhakhat masang in March 18 ni’n Mogaung khuo a Kachin Baptist Convention (KBC) pastor khat zong ana kithat hi.
Kawlgam buoina a Kawl galkap mite’n mipi galkapte Kachin Independence Army (KIA) te kithuopi dinga aginmaw zieh un siempute leh Pasian nasem mite thading atup uh ahi. Tami toh kisain in mipi galkapte Kachin Independence Army (KIA) te’n Kawl kumpi galkapte camp phasa khat March lha akipat in ana luo khum uhi.
