Apeisa May 13, 2026 nia unau Thadou Baptist Association (TBA) a lamkaite, Kangpokpi district in ahuop Kotzim leh Kotlen khuo kikal a, atuonna uh mawtaw ni sunga akikap liana uh tungtangah dana lien phuong ing. Hichia mawnabei hinkhuo beina leh mi tamtah in aliem lawna un genguollou da leh kana ahing abelap a, i state ua lunghimawna, zauna, lungsim thawmhaunate ahing sousangsah mama hi chilei chikhielsih va ui. Tambanga hun hamsa iman sung ua kinepna leh tha ei ngasah Pasian nasem lamkaite huoisie tah a akithana tungtangah mawpaina sang pen phuong ing.
Tulaitah in Manipur in sietna leh sietna ga genguollou athuoh nalaia, mun tuomtuom ah dipkuotna tamtah apienga, mipite gentheina asousang semsem hi. Tambang sil huoisiete in mihing hinkhuo siengthouna leh amanphat tuolsena’n aneiata a, kilemna lampi itot dinguh apoimaw dan ahing talang jel hi. Thuohla huoi zen a gamtat gilou in liemna khawllou in ei tut a, gentheina asaube nalaia, mihing kichimatna adausah gige hi. Hasatna leh zauna hi Manipur mite’n tamveipi leh sawtveipi ana thuoh khata a, damna leh kilemna, masang laia ina nei ngai uh aki hangaih mama hi.
Khumi ahijieh in, phuba lahna leh galphuol a kidel valuoina tawpsanta vai chi’n mipite kungah khupdin pum in ka ngen hi. Kihoutuona, kingaidamna, kilemna, kikhahthawna leh hinkhawmna lampi zuizaw ui chi’n hing chiel sawnsawn ing. Thunei laneite leh kipawlna khat poupou a lamkaite’n pilvang tah in, bangma langpanna neilou in vaihawm uh heh chi’n zong ngen ing. Hichi’n kilemna leh hamuonna mipite lah ah ahing um thei kia ding hi.
Tu kap leh mau a ium sungun, ei muolliemsante innkuonte dingin thumna hing nei pieh ing. Pasian mai ma ah kihei chiet vai ajieh pen Pasian bou ah khuotuona leh hepina akiningching hi. Ei muoliemsante hagau Pasian angah damkumsawtta uh hen.
Kilemna ei guon Pasian in akap amau nalaite hamuon henlen, ei bawlsiete ngaidamta uh heh tualeh Pasian in ei ching ei kem henlen Manipur ah kilemna leh kitheisiemtuohna umdenta hen.
Khrist ah,
+Dr.Linus Neli, DD.’ JCD
Archbishop of Imphal
