FABC Plenary Assembly nei sungin Asian Bishopte'n Jakarta a leinei kikawmtuona lampi ‘Tunnel of Friendship’ en ding uh

Indonesia gam a hun sotpi apat sakho tuom tuom kilemna siemna in Jakarta a Federation of Asian Bishops’ Conferences (FABC) Plenary Assembly a 12 na kineina ah kikupna lienpen leh hun poimawh tah atang ding hi, Asia gam tuom tuomte pan in Catholic siempupi tampi’n Tunnel of Friendship leh Jakarta-a Istiqlal Mosque, agam ua sakhuo kipawl khawmna etsahna lienpen a kilang gel ava ve ding uhi.

July 26 a assembly khana hun dingin siempupite’n Jakarta Cathedral ah Eucharist Mass siengthou a mang ding ua, tuami jou chiengin Tunnel of Friendship a tai phei in Southeast Asia a mosque lien pen Istiqlal Mosque ah apei kia ding uhi.

Leinei ah baitah a peina lampi maimai hilou in, Tunnel of Friendship hi Indonesia gam a sakhuo pawl tuom tuomte kihoukhawmna, kiza tuona leh kilemna toh umkhawmna et-tena lienpen a theizing ahi.

Tunnel siem ding hi kum 2020 a Istiqlal Mosque kisiemṭha laia President Joko Widodo in ana ngaituo masa a, Mosque kisiemṭha project kibawl laitah January 2021 in pat anahi a, Biehinnpi minthang ni Istiqlal Mosque leh Jakarta Cathedral kikal a kikawmtuo nading lei nei ah lampi ana kivut hi.  Indonesia's founding president, Sukarno hun kipat laia pan a nading khawm biehinn ni ahi. Bai tah a kikawmtuona lampi maimai hilou in sakhuo tuom tuomte kipawlkhawmna etsah nadinga bawl anahi hi. Tami tunnel in September 2024 a Pope Francis in Indonesia a Apostolic Journey a nei laia khawvel pumpi theina ana nga mama a, Istiqlal Mosque a Interreligious Meeting neina ah tami mun ana ve ahi. Tami tunnel hi December 2024 in official in mipi adingin ana kihong hi.

Minister of Religious Affairs Nasaruddin Umar in Indonesia in sakho tuom tuom, zat leh nam tuom tuom leh hindan/tawndan tuom tuomte kikal a kilemna um nading lampi asiemte hi leitung pumpi et-te thei ahi thu adieh in FABC Assembly a telte dingin et-te dinga poimaw tah ahi, achi hi.

Nasaruddin in, "Indonesia in kilemna asiemna lampi ah social capital hat tah a nei ahi. Asia gam tuom tuom pan a siempupite umna in kibahlouna khu kidaidatna hilou ahisih a. Lemna siem khawm theina dinga tha eikipie ahi chi etsah thei nadinga hun lemtang khat siem ahijo hi," achi hi.

Tunnel leh Istiqlal Mosque anigel in Indonesia namte manphat dan a ensah hi achi a, kihouna, kiza tuona leh kipumkhatna te sakhuo hinna tungtawn a kizungphuna ahi chi gen.

FABC Assembly kisahkhawlna tungtang kihoukhawmna neidinga Catholic Bishops’ Conference of Indonesia (KWI) toh akimutuo un, "Tami hun a hing telte’n tami chiemtena mu maimai lou in, Indonesia mite nisim hinkhuo ah sakho kilemna hinpi ahidan amau ngei in atuoh ding uh kadei hi," achi nalai hi.

Indonesia Bishops’ Conference president, Bandung a Bishop Antonius Subianto Bunyamin in Tunnel of Friendship leh Istiqlal Mosque vena khu assembly official closing program a koi ahi thu  agen hi.

Asia ram tuom tuom pan in siempupi 110 vel ang tel ding kinepna nei ahi a, America, Africa, Oceania leh Europe gam thakhel a hing peite zong atel ding hi. Istiqlal Mosque-ah Minister Nasaruddin Umar in Mosque a Grand Imam ahina bangin ana vaidawt ding hi.

Bishop Antonius in, "Minister in siempupite leh ang zinte’n tunnel of Friendship hi khana programme ah ave ding ua tualeh Istiqlal Mosque ah official tah in ana kivaidawt ding hi," achi hi.

Cardinal Ignatius Suharyo, Archbishop of Jakarta in tami vena in FABC Plenary Assembly a 12 na thupi poimaw tah: “Sil thupizaw munalai ding nahi,” (Jn 1:50): Asia gamkai sunga Pasian nasepna tungtawn a Lampi hiding leh Lampi siemte hiding ahi chi akilangsah hi chi’n agen hi.

Cardinal Suharyo in agen a, "Sakhuo leh hindan/tawndan tuom tuom a mite toh kimukhawmna zangin sil lien jo imu ding uhi. Pasian in kihoukhawmna lampi isiem leh sil loupi apieng thei hi chi ei musah hi. Tuajieh in Tunnel of Friendship vena ah Indonesia in chi tuom tuomte kal a kilemna toh hin ding adeina a ensah ahi," achi hi