Cardinal Bo in Asia gamkaipi a pawlpi khat hina toh kalsuon nadinga thu poimaw nga talahna nei
Ni nina (28 November 2025) Kinepna Lienpi toh Zinna Siengthou 2025 Malaysia gam a Penang khuopi ah Mass siengthou latna toh akipan a, tami mass siengthou latna ah mi 900 val gam 32 pan in atel hi. Mass siengthou pen Ballroom of the Light Hotel, Penang ah Charles Maung Cardinal Bo, S.D.B., Archbishop of Yangon, Myanmar mapuina toh lat ahi.
Diocese of Penang, City Parish a Deacon Paul Kang Gospel simna anei na toh Thuhoi Thpha ngai leh ngaituo nading mipi lungsim ahong hi.
Ei mapui ding Meivaah ngate
Hunpi a athugenna ah Cardinal Bo in Daniel 7:2-14 pan a Daniel mangmuna toh gente in Asia gamkaipia pawlpi hina a ikhuolzinna ua eivaah sah ding “Meivaah” ngate talahna anei hi.
Lungtang pan a thu ngaina
Cardinal Bo in thu leh laa ngaidan poimaw dan gen in hunpi patna anei hi. St. James thugente gen in mipi dohna anei a, “ Pawlpi in thu agen masang in thu angai thei diei?” Asia mite kikhawpna khat poupou ah ahamte hi aki ngaisang a hinanleh haugau lam ikhuolzinna hi thu leh laa ngai na toh akipan hi. Tualeh ibil maimai a ngailou in ilungtang azong ingai ding ahi.
Humpi kuo a Daniel in simtham a Pasian aw angai dan toh tekah in Cardinal Bo in Pawlpi leh Pawlpi mite’n asip a omding apoimaw hi achi hi. “Jau jieh a sipna hilou in ngai nadinga sipna. Ilungtang ua thu leh laa ingaite un ikiim ipam a sil ginte kinepna ahing suosah hi.”
Dinmun dei jieh a lamkai hilou in asem dinga lamkai hina
Meivaah nina hi lamkaina toh kisai in Cardinal Bo in thuhilna anei hi. Daniel in leengte leh aleenggamte uh hatna leh kietna te ana mu mabangin thuneina kichi hi hatna jieh a kinei ahisih a kingiemkhietna leh gin omtah a sepna pan a kinei ahi achi hi.
Lamkai dihtah in akhutme dawn a mi akawh sangin akeng uh asawp pieh jo hi achi hi. Bishop khat pan a atangthu ngai khat apat in agen a: Khutsip in leeng hina lungsim nang pieh leh paimang sin. Ahivangin tunou chingpa a nakigeel sih a leenga naki geel leh, nala doh a mikhat keeng nasawp hun ahita hi.”
Lamkaina kichi hi Pawlpi sung leh khuo sungah midangte dawpsangna ahi. “Asia gamkai ah zatatna hi aki ngaisang mama a, lamkaina kichi hi sepna ahi, dinmun ahisih hi chi ithei zing uh ngai,” chi’n Cardinal Bo in agen kia hi.
Chi leh nam tuomtuom hina hi zauna hilou in hamphatna ahi
Cardinal Bo in athugenna ban Asia gamkai sunga zat leh nam leh ham tuomtuom tualeh tawndan tuomtuom tamna gam ahina talah in tamho hi Pasian vaangbuohna lientah ahi achi hi. Daniel mangmu na zat leh nam jousie in Pasian in aphat ding gente in thuhilna anei hi.
“Asia gamkai sungah zat leh nam hileh ham leh pau leh tawndan tampi a um a hitama leh tamte tunga I pawlpi ikawi masat ngai ahi, tualeh Hagau Siengthou in khat leh khat ei houpi nate ingai ding uh kisam,” achi hi. Zat leh nam, ham leh pau tuomtuom tualeh tawndan tuomtuom tampi inei uhi kikhen nading a zanglou in Pasian thupha a isan ding uh ahi.
Migentheite alai a koiding
Meivaah lina in migenthei, anela atalate tunga Pawlpi mawpuohna thuhilna anei hi. Cardinal Bo in pawlpi mite kungah Topa Jesu thu leh laate’n migenthei, anela atalate adawmsang tawntung hi achi hi.
“Tuni’n Topa Jesu hingpei ding hitaleh heiah a um diei? Leengte inn ah a umsih dinga, migentheite, mizawngkhalte leh vaitaite lah ah a umding hi,” achi hi. Migehteite toh kalsuon khawmna hi tahsan mite adingin Khrist toh kimaituona ahi. Migentheite manghilna khu Gospel Thuhoi Thupha manghilna ahi. Migentheite alai a ikoi chiengin pawlpi lamzawtna asiensuo a tualeh iginna uh atuoisah kia hi.
Kipah thanuom tah a khangnoute panlah na
Atawpna a meivaah ahileh Asia gamkai a khangnoute tungtang ahi. Cardinal Bo in khangnoute tungtang a thu agenna ah amaute hi apil ua, akhutsiem ua akizawp ua tualeh tu khanga a hindan leh hagau hindan kikal akhenna sui in alai ah akiviel uhi achi hi.
Pope Francis thugen toh gente in, “Pawlpi in khangnoute hingpei ding ngahlou a, amaute kunga apei ngai ahi,” achi hi. Pawlpi sunga khangnoute dinga kisuhhalna laasahna hileh, thudohna hileh lamkaina leh mangmatna bawlpieh dingin ngetna anei hi. “Khangnoute toh kalsuonkhawm pawlpi khat khu avuoi theisih hi,” achi hi.
Ahingzing Khrist Thuhoi Thupha
A hunpi tawpna ah Cardinal Bo in leitung hausatna leh nei leh gout e hi hun tawmnou khat ading ahibou a hinanleh Khrist Thuhoi Thupha khu atawntunga hingzing ahi chi’n thuhilna anei hi.
“Khrist Thuhoi Thupha leh iitna maimai a umzing ahi,” achi a, ihinsunga tam meivaah ngate toh hingtawn vai chi’n mipi kunga chielna anei kia hi. Pawlpi sunga Ham sanga thu ngaina, lamkaina khu sepna, zat leh nam kipumkhatna, migehtheite alaia koina tualeh khangnoute panlahna pawlpi amangmu a hichi’n agen hi: Khanglui a Jesu Khrist Asia gamkai ah ahing kinuale a tualeh iitna leh kipumkhatna thu agente zathei dingin bil nei tapou in azah ding aphuong hi.
Ahun tawpna Cardinal Bo in thungetna toh ajou a: “ Topa Jesu aw, Asia gamkaia na mite toh zawhkhawm kia in. Thu ngai dingdan eihil un, na nasep dingdan eihil un, kipah dingdan tualeh ki iitding dante eihil un Asia gamkaia inn chin a na thu leh laa tahsa asuo masang sie in”.
Grandeur, Light Hotel Ballroom ah latna siengthou kilatna in Asia gamkai pawlpi sunga kipumkhatna leh chi leh nam tamdan a ensah hi. Latna siengthou a tel te’n Cardinal Bo thugente apatat thu uh agen ua, pawlpite malam huna zinkhawm dingdan tualeh tahsa leh hagau a tha angana thu uh agen uhi.
