Pu Cardinal Tagle in ‘’Kinepna lienpi toh siengthou zinna” Khawmpi ni’n St. Anne’s Basilica ah Latna siengthou nei ding hi.

‘’kinepna lienpi toh siengthou zinna’’ chi thupi manga Asia gamkai Katholik Pawlpi te’n 27-30 November in Penang khopi, Malaysia ah khawmpi thupitah mang ding ua, tuahun ah Pu Cardinal Tagle ( Pro-Prefect of the Vatican’s Dicastery for Evangelization) in St. Anne’s Basilica, Buskit Mertajam ah ni 29 November ni’n Latna siengthou mipi asang-atul toh nei khawm ding uhi.  Tuani chieng jong concert thupitah Fr. Rob Galea of Australia makaina toh nei ding uh ahi.

Pu Cardinal Tagle ahileh Leitung bup ah Katholik sunga milian leh minthang mama Cardinal khat ahi. Ama’n tam khawmpi ahing zinn ding jiehin mitampi leitung gam pat hing khualzin ding un gintatna lienpi kinei ahi. 

St. Anne’s Basilica in Bukit mertajam pen Malaysia gam ah dinga  katholikte Biehinn lui mama leh akum-akum in tam mun ah mitampi siengthou khualzinna nei jel na Munpi khat jong ahi.

St. Anne’s Basilica ahileh 1840 kum in French missionaries (MEP) kichi ten biehinn neukhat na lam ua, tuana gamdang mileh Malaysia nasemte biehinn na kailet uhi. 

Tualeh kum hingpei in biehinnpi khat kum 1880 in kilam ah, kumtampi zahnua in, kum 1958 in biehinn thupitah mipi 2000 kitatna dingin alienpi hingsuo ua, tutan in ki zang nalai hi. Tualeh kum 2019 in Vatican ah Katholik vaisai lienpi ten Basilica neunou hitah chin phuang ua, akum-akum in tam mun ah mipi atul-atul in siengthou zinna nei uhi.

Tammi khawmpi ah Asia gamkai sunga Katholik Pawlpi milien, milal toukhawm ding ua, Asia gamkai Pawlpi toh kisai thu leh laa,ngaina , hindan, tasanna chileh atuamtuam etnuam huai ding tampi nei ni 4 sung nei mang khawm ding uhi. Tam khawmpi pen FABC-OE te saina nuai ah ki mang ding ahi.

Tualeh tampi khawmpi ah Pu Cardinal Tagle Latna siengthou nei leh concert um ni ding ahileh 29 November hia, tuana koitapou tam vaiguon etnuam ten Radio Veritas Asia Facebook leh Youtube Channel tungtawn  livestream ah nai 5:30pm in na en-thei ding uhi.