Kerala State a siengthou pumpi a Jesu lim na tuong pen Jesu maitang ma ahi chi’n Vatican in Phuong
Apeisa November 15, 2013 kum a Kerala State a siengthou pumpi a Jesu lim na tuong pen Jesu maitang ma ahi chi’n Vatican in aphuongta a, tu ha May 31 ni in mipi et thei leh mipi bie thei in biehinn ah akikoita ding hi.
Mass lat laitah a siengthou pumpi a Jesu mai naki lah khu kum 12 achingta a, Vatican a kipat thuphuon ana kingah gige hi. Itheisa mabangun, pawlpi sunga sil lamdang pieng khat khu Pope phalna toh kiphuong thei pan ahia, ama phasatna akingah gige hi.
Tambang sil pienna ahileh Kerala State a, Christ the King Biehinn a na pieng ahi. Topa Mathew Kathickal in mipi dinga Mass alat laitah in tam sil lamdang ana pieng hi.
Archbishop Joseph Pamplany phasatna toh Rome a naki puo ahia, Rome pan a thuzahna pen kum 12 jou in ahing um pan hi. Vatican in phasatna apieh jou in tana archbishop in tami siengthou pumpi a lim pen Pope phalna toh mipi in a-et thei, abie thei ahita hi chi’n aphuong hi.
Thei dinga kilawm in, Topa Jesu lim tami siengthou pumpi a ahing kilahna kum sagi jou in Rome ah akipuo pan hi. Tam masangin Archbishop’s House ah ana kikoi gige hi.
Fr.Pathickal kichi khat in Matters India kichi pawlpi thusuo lai khat ah thu ana tut a, tua thu ahileh, Mass kilat laitah in tua siengthou ngaina in siempupa’n alattou a, awlawl nou in ahing lien deu a, ahing tang deu hi. Tami siengthou pumpi ah Topa Jesu lim ahing tuonga, tua Mass siengthou lat topa’n atuom koi doh a, siengthou pumpi bawnga kikoi siengthou pumpi azangta hi.
Mass man jou in Topa Mathew Kathickal in biehinn sunga nasempa kungah aensah a, Jesu lim chientah in akimu hi. Siengthou tana (monstrance) ah ata a, mipite bie dingin biehinn sungah akoidenta hi.
Tu-le-tu a Christ the King a munpi topa (parish priest), Topa Matthew Paravarakath in Shalom TV ah thuphuonna aneia, kum 12 sung naki ngah thu khu Vatican in adihna hi chi’n mipi kungah agen a, mipite akipah mama uhi chi’n agen hi.
Tam masangin tami munpi mipite’n thu angenngen ua, Vatican in phalna apieh jieh in akipah mama uhi.
Christ the King Biehinn ah tu’n siengthou pumpi a Topa Jesu lim leh meel suoh pen akibie panta dinga, tu ha 31ni in honna aumta ding hi. Christ the King Munpi ahileh apeisa 1962 a naki hong ahia, tami parish ah innkuon 500 aum a, pawlpi mi 1250 apha uhi.
