September 12, 2024 nikhoa simding: Luke 15: 20-25
CHAPA JAMMANGPA ATHALO DEHCHET E
Khangdong pasal khat a Pastor pa koma achen, "Pastor, kapa to kakihou khel jeh in In dalhan kana jammange. Kapan eimu le kachunga alunghang lheh dem? Ipi kabol'a phading ham?" tin agadongin ahi. Pastorpan, "Na Inna kilen lang napa koma nakhelna seiyin aman nangaidamin tin 'Chapa Jammang pa' bangin nana lem nante" atipeh in ahi. Amapa jong Pastor pan ahil bang chun Inlama apa koma din akile tan ahi.
Nikho phabep jouvin khangdong pa chu Pastor pa koma achen thu agalhut in, "Pastor, nasei bang chun kapa koma kakilen kabolkhel jouse eingaidam din kagaseiye" atin ahi. Pastor pan, "Nabolpha lheh e. Napan kelngoi thao atha nah em?" tin agah dongin ahile khangdong pan, "Athat poi. Chapa jammangpa joh athat deh chet e" ahinti, akiti.
Pakai Jesun Chapa Jammang thusim asei hi phatah a isim le chapa jammang pa lung kisih jong athupi nai. Hinla In a um apa lungput adeh a achapa angailut jeh a achapa dia alungsunga mun lentah anei kisei khu thupi deh in kagel'in ahi. Achapa jammang ana ngaa, "Gamla tah ahung gei nalaiyin apan agalmun, alaina behseh jengin, alhaijel'in akoiyin achop chuh chuh tai" atilai hin mipa khat lungput ding hi itobang lungput ahi ding eihil'u ahi.
"Apan asohte jah a, 'Von phapen tah galauvin vonpeh loiyun, khutjem bupeh-un, kengchot sepeh loiyuvin. Bong-nou thaotah chu gaman'un lang that loiyun, neu hitin kipa thanop bol'u hite, ajeh chu hiche kachapa hi athisa hing kit'a amangsa kimu-doh kit ahitai,' ati. Hiti hin kipa thanop abol'uve" ati. Eiho lah a Pa atamjo hi chunga thusima achapa hung kile kipah a kelngoi thapeh sanga lunghanga achapa joh that deh deh jong kitamda ahipoi.
Paten ivetjui diu hi vanna ipau Pathen ahin ama a kon'a Pa min hi ikilah-u hitei din akilange. Hinla Pathen limso hi chaten pate a kon a amudoh lou kom atamji e. Labu jihpan, "Mipan achate alainatpi bangin Ama gingte Pakaiyin alainatpie" atin ahi. Achate lainatpi lou Pa aum ding katahsan poi. Hinla Pakaiyin eilainatpiu chan geiya lainatpi mipa ihiu hinam kikhol angaiye. Ajeh chu Aman asei ngailouva ivamang geiyun eina ngah jingun gal'a eimu-u jongle eihin delpeh jiuve. Hijeh chun Paten lungnengin Pathenin achate alainatpi bangin chate lainatpiute tia katem nahiuve.
Dr. S. Chongloi
