Luke 4:16–30
Nazareth a Jesu kinuolna
Khumin ahing khandohna mun Nazareth khuo ah ahingpei a, khawlni a umdan ngaina bangin kikhopna sungah aluut a, Laisiengthou sim dingin adingta hi. Tualeh guolnei Isai laibu apie ua, Aman tambanga akigelna mun ahing pheendoh hi; “Topa Hagau ka tungah aum a, ajiehpen aman mizawngte kunga thuhoi hil dinga sathau ahing nusa kahi. Saltaangte suotaatna phuongzaah ding in ahing sawl a, tualeh mittote mitvaahsah ding leh bawlsietna thuohte tunga zaleenna peding leh Pasian deisah kum phuongjaah ding a sawl kahi,” achi hi. Khumin aman laibu khu akhup a, naseemte kung a apiehjou in, a touta hi; tualeh kikhopna inn sunga mi um jousien ama a en uhi. Khumin aman akung uah, “Tunin na jaahna uah tami laisiengthou pen taangtunsah ahita hi,” chin agen hi. Khum sunga mi jousien agenphachiet ua tualeh akam a hing pawt thu amanphat mama jieh in lamdang asachiet ua, amauten, “Tampa Joseph tapa hilou amah? “achi uhi. Khumin aman akung uah, “Ginla nading umlou in tami paunah na jang ding uhi, ‘Zatoupa nang-le-nang kidamsah in, Kapernaum a nasilbawl ka zaahte uh na gam ah zong bawl in,’ nahing chi ding uhi,’ chia agenjou in aman, “Chitahtah in nakung uah kahing hil ahi, guolnei koi hinanleh ama gam ah pahtaat in aum ngaisih hi. Hinanleh dihtah in kahing hil hi, Elijah hunlai in Israelte lah ah meithai tampi aum ua, kum thum leh ha guh sung vankot khaah a aum sungin mun jousie ah kiel nasatah atung hi. Khumin Elijah koima dang kungah akisawl sih a Sidon gam a um Zarephath kichi meithainu kung maimai ah sawl in aum hi. Tualeh guolnei Elisha hunlai in Israelte lah ah phaah tampi aum a, Siria mi Naaman chiloungaal adang koima damsah in aum sih hi,” achi hi. Tam thute azaah bep un kikhopna innsunga um jousie alungthah siengta uhi. Khumin akipan ua, khopi pulang ah adeldoh ua, a bungbu a khiet dingin a khopi uh umna muolpang keentawng lam ah azawpita uhi. Hinanleh amaute kaantan in apeimangta hi.
