NICHIN THUMNA PUITU By Rev. Awnkhankhup
October 13 (Ningani)
GAMLA TAH A ZUI-PETER
Hinanleh Peter in gamla sim khat ah siempu lien inn huong sung dong Jesu a zui a, tualeh a valut a a tawp tan thei tum in vengmite lah ah a vatou hi (Mat. 26:58)
Peter khu Pa hangsan tah ahia, Gethsemani huon a a guolte koima a kipia ngamlou lai ua, siempu mang suohpa bil a na satkhiehsahpa ahi. Jesu a kimat lai in a guolte a taimang sieng ua, Peter in ahileh gamla sim khat a pat in a zui hamham hi. Peter in meilum awina mun ah Jesu thumvei zen a kilepsan hi. Tuachia Jesu’n Peter a etleh, Jesu thugensate a hing theikhe pan phing a hase tah in a kap huthut hi (Luk 22:62). Tam mun ah Peter in gamlapi a pat Jesu a zui zieh a taisie a, kilepsan thei mai hidan in a kilang hi. Tuazieh in Jesu nua i zuina ah, nainou khat ah ama kung mama a um in zui lei, kilepsanlou in hangsan tah in i zui thei ding chi theithei in a um hi. Mangpa, nainou khat a hing zui ding ka hi, nangma toh zawhkhawm ka ut hi, chi va ui.
