NICHIN THUMNA PUITU
By Rev. Awnkhankhup
AUGUST 19 (SEPPATNI). KORAH APAWLTE
Tualeh leitang in a kam a kah a, amaute a innkuon un Korah mite zousie a nei alam zousie utoh a valtum sieng ta hi. Tuachin amauh leh anei alam zousie utoh a hing tang un leikohawm ah a kesuh ta uhi. Tuachin lei khu a hing kichi kia a, mipite lah a kipat a mangthai ta uhi (Num16:32,33).
Korah khu Levi suonte lah a Mosi leh Aron te tung a lungkimlouna neite houtupa ahi. A kithuguolpite khu Dathan leh Abiramte ahi uhi. A helna zieh dihtah ukhu Aron in siempi nasep a tan tuomse pen a thangsiet zieh uh ahi. Mosi leh Aron tung a agamtat dan ua pat Pasian a lungkimlou zieh in, leikhohawm sung leh mei a shi sah in a um uhi. Hattuom sung ah zong khawmpi tungtawn a Pasian in thau a nu hattuom lamkaite gensie a, simmaw tah a gamtate tung ah Pasian a thangpai thei zel hi.
