NICHIN THUMNA PUITU
By Rev. Awnkhankhup
SEPTEMBER 11 (NILAINI)
NA NASEP MANGPA KEM SAH IN
Nasep nabawl ding pouma Mangpa kung ah aapsiang le chin, na ngaisutnate a sudet ding hi (Prov.16:3).
I nasep dingte Mangpa khut a i kepsah zelzel ding ahi. Zingkal i thaw phet chieng a i nichin nasep ding leh maban ding zousie Mangpa kepsah a, i hinna mama zong ama khut a i kilat khieh zelzel ding ahi. Mihing ten tup leh ngim nei in, lemguotnate neizel nanlei zong, a lawching sah theitu ihilou ziehin, Mangpa khut a i kepsah masah zel ding ahi. Karnataka Sorkal Munpi Vidhana Soudha building mailam bang ah, ‘Government’s work is God’s work’ chi lienpi khat a thu kigel a kitah khie a kichi hi. Tuami umzie ahi leh, ‘Sorkal nna khu Pasian nna ahi’ china ahi. I nasepte Pasian nna ahi chi thei siam a, ginum leh kukal tah a i sep zel ding uh ahi. Tuaziehin, nasep ding hing petu khut ah i nasep dingte kemsah zel vai.
