NICHIN THUMNA PUITU
February 02 (Pasianni) Thulu: MANGPA NGAH HAMHAM IN
Na umdan ding Mangpa tung ah nga inlen, Ama muong in, Aman abawl sieng ding hi. Mangpa mai ah sip dide inlen, Ama ngah khinkhian in (Sam 37:5,7).
Pasian kung a na silngette a dawnna na ngah zelzel ei? A dawnna mulou in bangtan na um kha zel ei? Ngah zou ding khu sil hasa ina sa kha zel uhi. Sam geltu in Mangpa ngah hamham ding in ahing hanthawn hi. Sawltah Paul in zong tam bangin ana gen hi “I mu nailou i kinep leh kukal tah in i ngah teitei uhi” (Rom 8: 25).I mu nailou, ahivang a mu ding i kilamet te i ngah ngap zel uhi. I ngah ngap chieng in lunggimna leh beidotna a subei thei zel hi. A thuchiemte khatvei thu in hing tungpai sih nanleh, hing tung ngeingei ding ahi ziehin ngah zou man a um mama ding hi. Ngah thawn lou hial ding ihi uhi. Pasian in ei a ding a hoizaw ding silte ei sang in a thei zaw a, a hing kingahsah a leh ei ading a ngah zou khu hoi zaw tham ngeingei ding ahi. Lungzing leh beidong a um mailou in, thuohzou tahin i ngah hamham ding uhi. I bawl thei bangma a um tahlou nua alungkim dan theilou a bang amakhat ngaituo tuo mai khu phattuomna bei a kisuhbuoina mai ahizaw hi. Mangpa ngah hamham va ui.
By Rev. Awnkhankhup
