December 7/12/2024 nia ngaituo ding Thuhoi Thupha
Thulu: Kiveh lai nite hepha lou
"Huleh nang chu tual toh kikim in ahung suchim diing uhi, na sunga na tate toh; huchiin na sungah suang khat zong kithuapin a nuse sih diing uhi; ajiahchu ahung kiveh lai nite na hepha sih hi, chi in." (Luke 19:44)
Khua khat ah nungaah meel hoihtah a um hi. A khosung a tangvaalte hi in, khodang a tangvaalte hileh heeltu mi atam thei mahmah hi. Hizongleh hi nungaahnu chu a nulepa a kiliansah va, amah zong a kideihkhop jiahin koima'n a zou sih hi. Hun bangtan aha nungin koima'n heel nawn louin a leengkuul den hi. Amah deih a heelte ama'n a deih louh jiahin.
Hi a tunga nungaahnu bangin Pathian in mihingte chu Amah toh kiteeng diingin ahung chial zing hi. Thuhun Lui lai a zawlneite hunlai apat tunitan in Jerusalem chu Pathian thu soina munpi ahi. Jerusalem khopi ah Tanchinpha phuan masatpeen ahi zing hi. Hizongleh Jerusalem a teeng mipi tamzawte'n a nual va, a deih sih uhi. Hujiahin Lalpa Jesu'n sil hoihlou hung tung diing amuhlawh jiahin, Jerusalem khopi chu a kahkhum hi. Ajiahchu ama'n a kiveh lai nite a hepha sih hi.
Unau simtu deihtahte, Lalpa'n ni tengin ahung kou hi. Lalpa'n lam tuamtuam in ahung veh hi. Lalpa'n mi tuamtuam zangin ahung houpih hi. Hi chialnate na ngaihsah louhin chu na kisiih diing hi. Lalpa'n a thu i tan chiat va diingin hung vangpiahta hen.
Rev. S Kaikhanmang
