September 9, 2024 (Seppatni)
Mihingte kipumkhat ichih chiangin ahoih a kipumkhat leh aselam a kipumkhatna zong aum veve hi. Lunglut kibat jiah a kipumkhatna, Duh leh ngaih kibat jiah a kipumkhatna, Lungtup kibat jiah, ham leh pau kibat jiah a kipumkhatna leh adang tampi um hi.
Tulai in gaal jiah a kipumkhatna ilai ah aum hi. Kipumkhatna ichih chiangin pangkhawm geenna ahithei a, hi kipumkhatna hi imihing hihna ah zong, huleh gingtute hinkhua ah zong sil poimoh mahmah mai ahi. Huchouh hilou in I innsung chiat a zong ipoimoh kipumkhatna mah ahi. Sildang teng taisan in ei gingtute lai ah kipumkhatna poimoh hi chinuam hihang.
Paul in Gentile mite leh juda mi Ephesi khua a umte lai ah, sildang teng tungtawn hilou in nang uh a um Khrist jalin kipumkhat un chi hi. Tahsa leh hagau sil ah zong kipumkhatna ahung um chiangin gualzohna bang, isep ibawl a lamjanna bang hung piang ahihman in, ei gingtute kiheehtuah leh kisoise tuah himailou a kipumkhat thei diingin kisa ni.
