NICHIN THUMNA PUITU
November 15, 2024 (Ziltawpni)
Thulu: I TUNG A MANGPA A LUNGDAM LEH
I tung ua Mangpa a lungdam leh, tua gam ah ahing puilut ding a, ahing pe ding hi. Nawitui leh khuoizu luonna gam khu (Num 14:8).
Kanaan gam enkhetu khen khat ten, Kanaan mite let dan leh hatdante, zaw ding guol ahi lou dan thute uh a gen ziehun mipite a taisie ua, mangbang in a kap uhi. Joshua leh Kaleb ten ahileh, mipite hamuon in, a kung uah, “I tung a Mangpa a lungdam leh tua gam a hing puilut ding hi”, a chi zaw uhi. A hasa lam ngentang enzing mite khu a taise sa ahi ua, zong a guollel zel mawng uhi. Hangsan tah a hasatna maituo ngam mite ahileh a muolphou ngai sih ua guolzou tah in a peisuoh thei zel uhi. Tuaziehin, a hasa lam ngen tang en zing mai lou in, Pasian lam ngaiven leh ama hatna muong zel lei, ama zieh in zawna i tang ngei ding uhi.
