August 27, 2024
[Ephesate:4:25] Pawl khat ihi jieh un, koipou in ainnveeng alouveengte kungah thudih gen in, juau thugen tawpsan uhen.
Tuni i laisiebgthou taangteel ah apostle Paul in Ephesi khua a gingtute kunga nisim hinkhua a zah diing thumanpha agente lah a khat enkhawm lei ichi hi.
Juau thugen tawpsan a, michinin a innvengte kunga thudih gen diing chi ahi.
Thudih gen chiet ding chi hi abailam mama bang nanleh silnuam mama ahituan sam sih hi.
Tualeh, juaugen tawpsan ding chi zong, awle ,chi abailam a hima nanleh a juau thu kinuasie sahpen sil bailam hilou ahi.
Paul in tami mun a agen bangin Jesu Khrist a hinna nei mite in i nisim hinkhua a juauthu paidoh dingin ei dei a, tualeh ginna a i inkuanpite jousie kunga thudih gentu hi dingin ei dei hi.
Tua maimai hilou in gingtute jousie innsung khat a teengkhawm inkuan khat bang ihi jieh in khat le khat juauthu hilou in thutah igen chiat ding uh ahizaw hi.
I hinkhua uah juauthu kinuasie sah vai in, thudih leh thupha genna in ihun jangta ni maw.
