Tukum inzong St.Januarius sikhal sisan suoh kia
Italy gam a Naples khuopi ah sil lamdang khat apieng kia a, tua sil lamdang pieng ahileh St.Januarius sikhal sisan asuoh kia hi. December 16 ni’n Naples khuopi mite’n sun nitum in tam sillamdang pieng ding pen angah ua, tukum in azekai deua, ahi’n nitah Nai 5.40 PM lam in tua sikhal pen Naples khuopi biehinnpi (cathedral) ah sisan tahtah ahing suoh kia hi. Tam sikhal pen zingmawng Nai 9.00 AM a mipi et dinga Topa Gregorio Vicenzo in biehinn paam a akoi ahia, masanglai in zingmawng lam ma in sisan asuoh a, tutung in nitah lam in ahing suoh pan hi.
Tua sikhal sisan asuo jou in biehinn sungah akijawpi a, Mass Siengthou latna akinei hi. Tam sikhal pen gilas (maan) sunga a kikoiching ahia, sisan asuo chiengin gilas adim jel hi. Tam sikhal sisan asuona ahileh 1389 kum a kipan ahita bou hi. Tami sikhal sisan asuohsihleh tua kum in sil huoisie khat apieng teitei hi. Kum khat, chi pen 1631 kum in tua sikhal sisan asuohsih a, hichi’n Vesuvius muol apawh a (volcanic eruption) itheisa mabangun tami muol pawh in Pompei khuopi avuadimta hi. Leitung Galpi Nina ahing kipat kum, 1939 kum in tua sikhal sisan asuohsih a, hichi’n Leitung Galpi Nina ahing kipanta hi.
St.Januarius hi, Rome a kumpipa Diocletian hun laia naki that ahi. Tua masangin meikuong li ah ana kiseplut a, bangma achisih hi. Tuajou in humpi neh dingin humpi mai ah akisep kia a, humpite’n apet ngamsih ua, ahing zuol uhi. Tua jou in ngawngvat dingin aki puia, angawnvat dingpa thakhat in amit ataw a, bangma amutasih hi. St.Januarius in adamsah a, hichi’n mi tamtah Khristien ahing suoh uhi. Atawptawpna ah ama leh alawm sagite akingawng vat ua, a tahsa Naples akitut hi. Akingawngvat jou in Eusebia kichi nupi khat in asisan phasa khat aluoh a gilas ni ah athaal hi. Asi nitengin tua sisan khu ahing sou jel a, hichi’n tua sisan tutan in akikem nalai hi. St.Januarius tutan in jatatna akipie nalaia, ama kungah thu akingen nalaia, sil lamdang apieng let hi.
