Pope Benedict thupha pieh jieh in Khangnou khat cancer natna apat dam in tun siempu suoh

Pope Benedict thupha pieh jieh in Khangnou khat cancer natna apat dam in tun siempu suoh

Fr. Peter Srsich hinkhuo tangthu hi laisiengtho simun Romans 8:28 toh akizawp mama hi.

Khangdong Peter Srisich hi kum 17 achin in nasatah in ahing dammo a, a innsungmite’n anatna hi pneumonia dingin agingmo ua

tualeh zatote’n anatna asuichien zo un akal ah tumor khat amu ua tuazo in stage four non-Hodgkins lymphoma toh aki diagnosed tahi.

Tuazo in chemotherapy akikap a tuahun laiin ana lunggim mama a tualeh bangdinga tambang dinmun ka tuoh ahiei chi’n ama leh ana kidong let ahi.

Adammo masang apat in siempu ana suoh ngap a hinanleh zato inn a omlai in siengtho pumpi hi ana sang ngap sih ahi.

Tami tungtang hi anuasang in Denver Catholic kung hichi’n ana agen a, “Siengtho pumpi kasan laitah kanu’n eimu leh alungop ding katheia tujieh in ke’n zong kana sang ta hi.

Ka sangkaina a ka lawmpa khat in siengtho pumpi ei tawi pieh let a kana sang let hi. Tami siengtho pumpi tungtawn ah

Topa Jesu Khrist kamu a tualeh kalungtang ah thu ahing gen ahi, “Peter aw, tua nadinmun hi kathei siem mama a, hinanleh nathuo gentheina hi ka ladoh sih ding ahi, hinaleh kang ompi zing nading hi”, achi hi.

“Tuami hun laitah ahi ka tahsa tungah bangma kikhelna om naisih nanleh keia dinga bangkim akihel hun”, chi’n Peter in agen kia ahi.

Make-a-wish kichi Foundation khat a om a tami ahileh naupang leh khangdong damlo a om, anatna jieh a

dam tholou ding dinmun a omte kithuopi na pawl khat ahia, amaute’n asi dinga om adamlote hi alungtup khat uh atangtun thei nading in akithuopi let uhi.

Tam mabangin Peter in Make-a-wish Foundation te panpi nazal in ana lunggul khat Pu Pope Benedict toh kimu tuo thei dingin ahing omta ahi.

Pope toh akimuna

May 2012 in alungtup ahing tangtung ta a, a innkuon un Pope toh kimu dingin azin ta uhi. St. Peter’s Square ah apei ua Pope Benedict XVI in mipi athuhilna angai uhi tuazo in khat-khat in Pope akimupi thei uhi.

Pope kimupi dingte’n khutsuo khat-khat chiet atawi ua Pope apie uhi, tam hi apa’n amu bep in atapa Peter kungah akhut a agah puon khat “Peter dingin thu nget pieh in” kichi tualeh Peter in adei mama

laisiengtho simun Romans 8:28 “Bangkim ah Pasian in Ama itte, ama deilam bawl dinga ahatte khu silpha abawl pieh hi, chi khu ithei uhi”, chi toh kituoh khu Pope khutsuo in pie in achi hi.

Pope Benedict XVI toh akimu na tungtang Peter in hichi’n agen a, “Pu Pope in ei en a, “Oh, Mangkam nathei ama?” eina chi hi, ka natna kagen masangin akhut ka tahsa tunga tumor omna mun chet ah ahing koi pai hi. Atangpi’n thupha eiki pieh chieng in ilutunga eiki pie let ahi bou hi”.

Thupha eipieh zoin Pu Pope kungah siempu khat kahi ngap nathu kagen a thupha kaki piehsah kia hi achi hi.

Mi tampite’n Pope thungetna in sil lamdang apiengsah hi achi ua hima nanleh Peter in laisiengtho Romans gieldan toh kituoh in ana mu hi: “Chemo in cancer apat in ei kithuopi a

tua mabangin Make-a-wish Foundation te’n chemo apat in ei kithuopi kia ua, mailam a Pope toh kakimuthei nadingin sil neuneu apat in vangphatna kana mu toutou a cancer apat kahing damdoh ta hi”, chi’n 2013 kum in ABC News kungah anagen ahi.

Pope toh akimuna uh kum 10 bang achin ding phiel in Peter lungtup khat toh ahing tangtung kia tahi. Pasian aw nem in ahatna dungzui in 2021 kum in Peter in ama maibu (Facebook) lim a imu mabang un siempu hina suhdetna ana nga tahi.

Ahinkhuo tungtang hichi’n kilom tah in Denver Catholic kungah ana gen ahi:

“Pasian deidan dungzui in leitung kahing muthei ta a, etlawm kasa mam hi tualeh keia dinga nasem hinonlo in mipi adinga nasem kahita hi. Topa’n kahin khuo eina zah pieh a tualeh sil bangkim eina tuosah hi”.