Inveng Misiengthopa Doctor suohta
RVA website ah thusuo tamtah akikhum a thusuoh lah ah ‘Inveng Misiengtho’ (The Saint
Next Door) kichi thusuo khat aom gige hi. Inveng misiengtho chi pen, misiengtho suohte
china ahisih a, inveng leh khuo leh tuia nasep hoih bawl tapo Inveng Misiengtho kichi ahi.
Tutung in RVA Zo Service in Dr.Thanshok Kamkra tangthu asut a, simnop huoi thei tan a
kisut ahi. Ama hi DSSS insia lam a Tabitha Children Home kichi na phutpa ahia, pasal kukal
mama khat ahi. Tana om naupangte ahileh HIV natna bangte ahi ua, zatui zaha toh kikem,
anneh tuidawn kiguon leh sum leh pai tamtah tawp a sang kikaisah ahi. Phasa khat Krist Jyoti
School, Mantripukhri ah akai uhi.
Dr.Thanshok pen, Ukhrul District a Longpi khuo a pieng ahia, atangval lai pat in
sangnaupang lamkai in ana panga, Manipur a Tangkhul Nagate kipawlna tuomtuom ah
lamkai in ana pang gige a, mipui siem mama khat in ana kithei hi. Khuo leh tuia hasatna
tuohte tamtah ana panpi gige hi. Khatvei, Kuki-Naga gal kisat lai in, Kuki innkuon khat ana
hudoh kawi hi.
Tabitha Children Home ah naupang natna tuomtuom veite akem a, zatui zaha toh avenga, azi
toh akem uhi. Thei dinga kilawm in azinu, nu Tammi hi pape lei bawl siem mama khat ahia,
Manipur a pape lei hoih pen amatea ahi. Mi tamtah pape lei ding leh pape kawm dingin ahing
kuon uhi. Pape azua ua, tua sum toh naupangte akem uhi.
Hichia anasep hoi kumpite, NGO leh leitunga kipawlna tuomtuomte’n amu chiengun
alungkimpi mama ua, nuomman zong apie uhi. Kum lui November 7 ni in International
UNICEF Council, USA in Achiever Award (Lawchinna Nuomman) ana pie a, tuathamlo in
Germany a International Peace University in 29 February, 2020 in Doctorate Degree ana
tangsah hi.
Dr.Thanshok lawchinna hi apeisa April 14 ni in Mantripukhri a Tabitha Children Home ah
akilawm a, mi lien mi lal tamtah ahing haw ua, mipi’n khut abehlu uhi. Rev.Prim Vaiphei,
All Manipur Christian Organization a lamkaipa’n Dr.Thanshok thupha apie hi. Tuajo in ann
zaluina akinei hi. RVA Zo Teamte zong ava pang ua, tami thusuo ahing suo uhi.
