GINGTUTE A DIA GALVAN HOIH PEN TUH THUMNA AHI !
✍️ Mawi Tawmbing
Midiktat thumna in thil thupitak ahihzel hi. Elija leng eimah piandan bang pu mihing mah ahi a, amah tuh vuah zuk louhna ding in phatuam ngaitak in a thum a, huan, kum thum leh khaguk sungteng leitung ah vuah a zuta kei hi.
Jacob 5:17
Elija hinkhua a kipan in, Pathian tate thum di ahihdan hon musak mahmah mai hi. Thumna mah in thil hihthei in, nnasem theihpen hi. Ei Khristiante i thum ding mah ahi a, thum ngeiloute tuh misi naklou toh kibang ahi. Thumna poimoh dan leh manphat dan thupilua hi. Lungkhamna haksatna i tuah chiang in mihing ah tai mailou in, i lawm kiang ah khamuanna zong mailou in Pathian kiang ah i tai ding uh. Mihing a muanna nei a i tai chiang in sawt a daih louh kia hilou in, i muhsun chu khasiatna lel ahinak hi. Pathian kiang mah ah tai ni. Na poimoh leh taksap hon theihpihtu i neihsun Toupa ahi. Chitaktak a i thum nak leh hon dawng dia mansa a, i kiang a om gige ahi. Eite a di'n thildang tengteng sang in THUMNA mah poimoh pen hi.
Lunglut tak leh lungsim taktak toh i thum leh Toupa toh kithuah khom pen nakpi takin manpha hi. Thum gigete leh thum ngeiloute lungsim puakgik puakdan kikhai mahmah ding in ka gingta hi. Thumna manphat dan leh thil hihtheih dan, tawldam huai mahmah hi. Kuamah hon theihpih louh a lungsim tawldam taka hinkhua zangthei a guk a kipahna thuguk neih theihna hinkhua zaw thumna mah ahi. Huaiziakin, Toupa toh kipolhna hun zangtheite mi hampha tuansete ahi uhi. Thum gigete lungsim thoveng in, a niteng hun zatte uh nuam takin zang thei uhi. I tan bangbang toh lungkim thei a Toupa toh hun zangthei hih sawm chiat ni. Tua ding in eite i thum ding a Toupa toh i kithuah theihna omsun thumna ahi. Mihing ah tai mailou in Toupa kiang ah tai ni. Na haksatna leh lungkhamna teng a theitu Toupa ahi. Na buaina hon hih vengsak ding hi. Na thumna dawn in ompah kei leh-le nikhat ni chiang in Toupa dawnna na mu ngei ding hi. Na hun paisate sut lechin na tung a Toupa hoih dan namu ding a, ka ngetlouh tan in leng Toupa'n ka thumna hon dawng eive na chithei ding hi. I lawm hoih leh muan pen, i poimoh pen ding Toupa lawm in nei ni. Amah toh kithuah in i Pa kiang ah i poimohte ngen in thum ni.
Toupa aw nang mah kiang a ka poimohte uh hon ngen a, nang Pa a hon nei a, ka haksatnate uh hon tun theizel ding in hatna thak hon guan in. Nang toh kithuahkhawm theihna ngai poimoh a, thumna a manphat dan leh a thilhih theihdan hon muchian sak in la'n, thumna ngai poimawh sem thei chiat ding in hon makaih in.
Tuabang chithei chiat di'n Toupa kha in hong ompih hen aw !!
