Kapernaum khuo a dawimat Jesu’n adamsahna
Tuachin amaute Kapernaum khuo aluut ua, khawlni in Jesu kikhopna innsungah aluut a, thuhil akipan hi. Laigielte thugen banglou in aman, thuneina nei bangtah in thu ahil jieh in lamdang asa mama uhi. Tualeh akikhopna inn uah dawimat mi khat aum a, aman, “Nazareth Jesu, kou bang hing lawsawm namah? Kou hing gawt dinga hingpei nahi amah? Nang kahing thei ua, Pasian misiengthou nahi,” chin akikou ua, Tualeh Jesu’n, “Sip inlen, asung akipat in hingpawt in,” chin ahousie hi. Dawi in ama a eengbawl a, aw ngaitah a kikou in asung akipat in ahing pawtdohta hi. Tualeh aunpi un lamdang asa mama ua, “Tami bang ahi amah? Thuhilna tha ahi! Dawi nangawn kungah, thuneitah in thu apie a, athu amang uhi,” chin akidongtuo uhi. Khumin Galili gam kiimveel ah amin athaangta hi.
