Luke 1:5-25
Baptispa John pien ding genna
Judea gam a leengpa Herod hunlai in, Abijah pawl lah a mi amin Zekariah kichi siempu khat aum hi. Aman Aaron hah-le suonte tanukhat zi in aneia, amin Elizabeth akichi hi. Tualeh ani un Pasian mai ah adihtat mama ua, Topa thupiehte leh adanchiemte nielnabeikeei in azui uhi. Hinanleh Elizabeth achiing ahijieh in ta neilou in aum ua, ani un ateeh lam ahita uhi. Amaute pawl nasep hun ahing tun a, Pasian maia siempu naa asep laitah in hichin aum hi. Siempute tawndan dungzui in Topa biehinn sung aluut a gimnamtui haalding vang-etna abawl uh khu ama tung ah atuta hi. Tualeh gimnamtui ahaal laitah un, mitampi apulang ah thu ngen in aum uhi. Khumi hun laitah in, akungah, Topa vansawltah khat gimnamtui maitam ziet lang a ding in ahing kilang hi. Tualeh Zekariah in ama amu bep in abuoi mama a, a zauta hi. Hinanleh vansawltah in akungah, “Zekariah aw, zausin, na thunget akija a, tuachin na zi Elizabeth in tapa khat ahing nei dinga amin John nahisah ding hi. Tuachin kipahna leh thanopna na nei dinga, tualeh ama pien jieh in mi tampi akipah ding hi. Tuajieh in Topa maiah athupi ding a, tualeh leenggazu leh khamthei mawng mawng a dawnsih ding hi.Tuachin anu sung nasan ah zong Hagau Siengthou in adim ding hi. Tualeh Israelte Topa, a Pasian lang uah akilesah ding hi. Khumin pate lungtang tate langah ahei dinga, tualeh thumangloute midihtatte pilna lang ah ahei ding hi. Tuachin kigingsa a umte, Topa langa mansa in aumsah ding in, Elijah thahaatna leh hagau nei in, amasang ah, apei ding hi. Tualeh Zekariah in vansawltah kungah “Tami bang kachi gin taatthei diei? Ajiehpen kei lah teehsie kahita a, tualeh ka zi zong teehsie ahita hi,” achi hi. Khumin vansawltah in, “Kei Pasian umna mun a ding Gabriel kahi. Tualeh tami thuhoi na kunga hing puo leh gendoh dinga hing kisawl kahi. Tualeh ngai in, tami thute ahing taangtun masangsien thugentheilou leh haamtheilou in naumding hi. Ahun chin chienga hing tungding, thu kagente natahsan loujieh ahi,” chin agen hi. Tualeh mipite Zekariah ngah a um ahi ua, biehinn sunga ahing kiheeh seeng jieh in lamdang asa uhi. Ahing pawtdoh in, akung uah thu agenthei nawnsih a, etsahnate bawl in haamtheilou in aumdenta hi. Tuachin amauten bieh inn sunga mangmuna khat mu ahi chi athei uhi. Khumin aman siempu naa asepding hun abeibep in a inn lang ah apeita hi. Tomkhat jou in azinu Elizabeth ahing gai a, ha nga sung inn sungah akikhum hi. “Mi maia ka zumnate laahdoh nading in, Topan ahing en a, ka tungah tambang in naa aseemta hi,” chin agen hi.
