Luke 1:26-38
Ha guh achin bep in, Pasian akipat in vansawltah Gabriel khu Galili gam a Nazareth khopi aum, David hah-le-suon a Joseph kichipa toh kikhaamsa nungah siengthou khat kungah sawl in aum hi. Nungah nu min Mari ahi. Tualeh ama akungah ahingpei a, “Zahuoi Mari aw, hepina toh na kidim hi; Topa nang toh aum khawm hi,” chin agen hi. Khumin amanu abuoi mamata a, bangchibang kinousietna ahitabep diei, chin akingaituo hi. Tualeh vansawltah in akungah, “Zausin, Mari aw, Pasian deisahna nga nahi,* Ngai in, nahing gai dinga, tapa khat nanei ding hi. Tualeh amin Jesu na hisah ding hi. Ama ahing thupi dinga, Tungnungpenpa Tapa akichi ding hi. Tualeh Topa Pasian in, apa David mangtoupha ape ding hi. Ama leenggam in tawpni anei ngai sih dinga, Jakob innkuon sungah kumtawn in vai ahawm ding hi,” chin agen hi. Tualeh Mari in vansawltah kungah “Tami bang ahing chi hithei valong diei? Ken lah pasal nei nailou ing a,” achi hi. Khumin vansawltah in akungah, “Hagau Siengthou tung dinga, tualeh natungah ahing Tungnungpenpa thahatna hiim in ahinglie ding hi. Tuajieh in ahing pieng ding nausen pen asiengthou, Pasian tapa akichi ding hi. Tualeh ngai in, na sanggamnu Elizabeth zong ateeh nua in tapasal apaaita hi. Taneilounu achi uh agai kalsie haguh achinna ahita hi. Ajiehpen Pasian akipat in bangma ahitheilou aumsih hi.” chin agen hi. Khumin Mari in, “Ngai in, kei Topa suohnu kahia, na thugen bangin ka tungah hing tungta hen,” achia; tuachin vansawlsieng in anuasieta hi.
