LUKE 21:5-11
Jesu’n Jerusalem Biehinn akisuh siet ding agen masahna leh chiemtena thu
Khumin mi khenkhat in biehinn tungtaang thu a, suong thupi tahtah a kilem leh sil kidongkhawm a akijep hoi dante agen uleh aman zong, “Hichibang na silmute uh ahileh suhchiplou a suong kichieng aumlou nite ahing tung ding hi,” achi ahi. Khuchin amauten akungah, “Siepa, tambang silte bangchih chieng a hing um dinga, tam silte ahing tun hun chieng in bang chiemtena ahing um diei?” chia adoh uleh, akung uah, “Solh a na umlou nading un pilvang un; ajiehpen ka min suong in mi tampi ahingpei ding ua, amauten, ‘Kei Khrist kahi, ahun ahing tungta hi!’ ahing chi ding uhi. Khuchibang mite nua zui sih un. Tualeh kidouna leh buoina na zaah chieng un zausih un, ajiehpen, tam silte khu ahing tung masa ding mawng ahi, hinanleh hun tawpna khu ahinai sih ding hi,” achi hi. Khumin akung uah agen a, “Nam le nam ahing kidou dinga, gam tuom leh gam tuom ahing kidou ding hi; zil hatang liin in ahing kiliing ding a, mun tuomtuom ah kiel leh natpi ahing tung ding hi; tualeh van akipat in sil zauhuoi leh chiemtena thupitah ahing um ding hi.
