LUKE 16:19-31
Mihausapa leh Lazarus
“Mihausa koi ahiei khat aum a, aman puonsandup leh taangching puon asil a nichin in nopsatah a pawi bawl in aum hi. Tualeh mizawng khat amin Lazarus kichi apumtanga phaah khat aum a, ama mihausapa keelkot phungah alumsah ua, aman mihausapa dawkang tunga a khateneng kete neh a gil vasah a-ut a; uite ahingpei zeel ua, a himate a liehpieh uhi. Khuchin Lazarus ahing shi bep in vansawlsiengten Abraham aangsung ah apuiluutta uhi. Khu chin mihausapa zong ashi a, akivuita hi. Ama khu genthei hesuoh thuoh in Mishikhuo ah ahing umta a, tuamin a daahtou leh Abraham aangsunga Laza rus umkhu amuta hi. Tuamin ama akikoukhie a, “Pa Abraham aw, hing hepi in. Lazarus in a khutme dawn tui ah hing die in kalei hing votsah dingin hing sawl in,’ achi hi. Hinanleh Abraham in akungah ‘Ka tapa nang in na damlai in sil hoite na kimu a, tuamabangin Lazarus in silhoiloute amu hi chi thei vete; hinanleh tu in ama hamuon in aum a, nangpen gimthuoh in na um hi. Tua gentahlou, kou leh nou kikaal ah guomkuoh lienpi khat aum a tuami khu tamlang akipat tualang a hing gaalkai utte ahing tun theilou nading uleh tualang akipat a kou lang ahing pei sawmte ahing gaalkai theilou na ding uh ahi,’ achi hi. Tuamin aman agen a, ‘Khuchi ahileh pa aw, ama ka pa inn a sawl ding beh in kahing ngen hi; ajiehpen unau pasal nga kanei a ama uh va hil leh, khuchilou in ama uzong tammi gimthuohna mun ah ahing luut kha ding uhi,’ achi hi. Hinanleh Abraham in akung ah,‘Amauten Mousi leh guolneite anei uhi, tuate thu na ngai uhen,’achi hi. Tuamin aman, ‘Hilou e, pa Abraham, mishi lah a mikhat akung uah vapei leh akisia ding uhi,’ achi hi. Tuabepin aman zong akungah, ‘Amauten Mousi leh guolneite thu angaisih uleh mishi lah akipat mi khat thoudoh nanleh atahsang tuomsih ding uhi,” achi hi.
