Luke 10:1-12
Nuazui sawmsagilenite kisawlna
Tuazouin in Topan midang sawmsagileni aguong a amau pei nading mun leh khuo jousie ah ni-ni in amasawl hi.” Tualeh aman akung uah, “Buat ding tampi khat aum a, hinanleh aseem dingte atawm hi. Tuajieh in bu nei Topa kungah bu-aat ding mi ahing sawl nadingin ngen un. Na lampi uah pei unlen, ngai un, ngie hon lah a keel nguoinoute banga kahing sawl nahi uhi. Na sumbawm uh, na kawlzaal uleh na keengdap uh posih un; tualeh lampi ah koima nousiet sih un. Koi inn hinanleh naluutna uah amasapen in,‘Tami inn sungah lemna umta hen,’ chi un. Tua mun a lemna tapa ateen leh lemna napieh khu atung ah tu van in, ana hisihleh nangma kungah ahing kile ding hi. Tualeh khumi inn ma-ah umden unlen ahing pieh tapou uh ne un, ajiehpen, naseemten athaman uh amu ding uh ahi. Tualeh inn tuomtuom a na kituon kawikawilou ding uh ahi. Heisung hinanleh khopi khat a naluut ua ahing vaidawn uleh na ma ua ahing luitapou uh naneh ding uh ahi. Damlou ana um leh damsah unlen, akungah,‘Pasian gam nakungah ahing naita hi,’chi un. Tualeh heisung khopi hinanleh naluut ua ahing na vaidawnlou uleh a khopi ua lampite ah pei unlen, ‘Na khopi ua leivui ka keengphaang ua baangte nasan zong nou douna’n ka thing khie ua, bangteng hinanleh Pasian gam ahing naita hi chi thei un,’ nachi ding uhi. Kahing hil nahi uhi, khumi ni chieng in khumi khopi thuohna saangin Sodom khopi thuohgimna athuoh nuomzo ding hi.
