Luke 6:27-38
Na gaalte it un
‘Hinanleh nou kathugen ngai khete aw, na gaalte uh it unlen, ahing mudate tungah silhoi bawl un. Ahing gausapte thupha pie unlen, ahing simmawte thu ngetpieh un. Na pheta beengte kungah khat lang zong daw un. Tualeh na puon hing laahpiehte kungah na puon-aah zong it sih un. Nakung ua sil hing ngen tapou pie unlen, na van late kungah nua nget sih un. Tualeh mi’n na tung ua abawl ding ua na dei bang un nou jong mi tungah bawl un. “Nou hing itte maimai na it uleh nou ding in bang aphatuom diei? Ajiehpen mawneite’n zong amau itte a it uhi. Na tung ua silhoi bawlte tung maimai a silhoi nabawl uleh nou ding in bang aphatuom diei? Ajiehpen mawneite’n zong khum bang in abawl uhi. Tualeh namukia nading maimai te nabatlaahsah uleh nou ding in bang aphatuom diei? Ajiehpen a phaza ma nua mu dingin mawneite nasan in zong apalaahsah uh hilou amah? Hinanleh na gaalte it unlen, naa hoi seem un, bangma nua mu kineemlou in bat lasah un. Tuachin na nuomman uh athupi ding a, Tungnungpenpa tapate nahi ding uhi; ajiehpen ama kipah dan theiloute leh mi huoihamte leengpa zong ahi hi. Na Pa uh milungsiet siem ahi bangin nou jong mi lungsiet na siem ding uh ahi.
Kidemna thu
Thu khen sih un, tuachin na tung uah thu akikhen sih ding hi; siemmaw tangsah sih un, tuachin siemmaw tansah in na um sih ding ua, tualeh ngaidam un, tuachin ngaidam in na um ding uhi. Pie un, tuachin pieh in na um ding uhi; hoitah in tee unlen, namdet unlen, thing thop unlen a leet in tee un. Na aang sungah tuabang in ahing kikoi dinga, ajiehpen, napieh ding a na tee bangin na nuamu ding hi,” achi hi.
