Matthew 24:42–51
Tuajieh in bang ni chienga, na Topa hingpei ding chi natheilou jieh un, hoitah in kiging un. Hinanleh tami thu theichien un, inntehpa’n guta hing kuon ding zan thei masata leh, ana pangding a, a inn aphetvangsah sihding hi. Tuajieh in, na gintaatlou kal hun ua Mihing Tapa hingpei ding ahijieh in, nou zong kigingsa’n um un.
Suoh hoi leh hoilou gentena
“Suoh muonhuoipa, apil a, apupa’n a inn suonna sunga vaihawm a apansahpa, neh-le tah hoitah a saipa koipen adiei? Apupa’n ahing tun chienga tua banga na gamta amupa ahampha ahi. Tualeh ka hing hilh ahi: tua mipa pen anei alam jousie tunga vaihawm in apangsah ding hi. Ahin agilou suohpa’n alungsim a ‘Kapu hingtung ha nava’ chia a ngaisut jieh in, asuoh dangte na vuo in zukhamte toh ne in dawnta leh gintaatlou kaal leh atheilou kaal in apupa ahingtung ding a, tuapa apu’n agawt dinga, milepchiete lah ah akoi ding hi. Tua nah mihingte kap-le hagawi in aumta ding uhi.
