Luke 1:39–56
Elizabeth kunga Mari ahawna
Khumi hun in Mari ahing ki sadoh a, singtang aum, Judea gama khopikhat ah kintah in apeita hi. Tualeh Zekariahte inn sungah aluut a Elizabeth chibai abuh hi. Khum in Elizabeth in, Mari toh chibai aki bawl laitah un, asunga naungeh khu akidieng hi. Tualeh Elizabeth khu Hagau Siengthou in adima, Awngaitah a kikou in aphuong zaah hi.“Nang numei jousie lah a thupha nganu nahia, na sunga na paai naungeh in zong thupha anga hi! Tualeh bangchidan a ka Topa nu keikunga hingpei nahi ama? Tuajieh in ngai in, chibai kibuh ding akhut ikihaah laitah in, ka sunga naungeh khu kipah in akidieng hi. Tuachin Topa akipat a akunga thu kigen hing taangtung ngeinava chia gingtanu in thupha ngata hen,”achi hi. Tualeh Mari in hichi bangin agen hi, “Ka hinna in Topa apahtawi a, Ka hagau zong ka Hundampa Pasian tung ah akipah hi. A suohnu nam ngiemdan ahing mupieh jieh in, ngai un, tu akipat in, khang jousien thupha nganu ahing chiding uhi. Ajiehpen Ahattungnung in sil thupitah kei a dingin ahing bawlpieh a, amin khu a siengthou hi. Akhang akhang in, ama gingtate tung ah a lungsietna a tung hi. Akhut ngei in ahaatna khu a ensah a, lungsim ngaituona a kilien sahte khu athethaang hi. Aman ahaatte khu a mangtoupha uapat in akaidoh a, nam ngiemte khu atawisaang hi. Agilkielte ann tuitah toh avaah a, ahausate alaahmang pieh hi. A lungsietna kithei zing na in a suoh Israelte apanpi hi. Aman ipu ipate u kunga agensa mabangin, alungsietna Abraham leh ahaah asuonte tungah kumtawn in aum zing ding hi. Khumin Mari asanggamnu toh ha thumvel aumkhawm a, a inn ah akileta hi.
